Փաստ ինֆո

Ալկոհոլային խմիչքից զանգվածային թունավորման գործով մեղադրյալ Աշոտ Հովսեփյանն ազատ է արձակվել։ Արմավիրի մարզի ընդհանուր իրավասության դատարանը՝ դատավոր Արթուր Ադամյանի նախագահությամբ, բավարարել է Հովսեփյանին գրավի դիմաց ազատ արձակելու մասին պաշտպանի միջնորդությունը՝ գրավի չափ սահմանելով 2 մլն դրամը։ Գրավի գումարը դեպոզիտ հաշվին փոխանցվելուց հետո Աշոտ Հովսեփյանն ազատ է արձակվել։

Պաշտպան Գոռ Գևորգյանը «Փաստինֆո»-ի հետ զրույցում նշեց, որ փաստաբանական հարցում է իրականացրել քրեական գործով տուժող ճանաչված անձանց և նրանց իրավահաջորդներին՝ 17 հոգու, որոնք կարծիք են հայտել, որ Աշոտ Հովսեփյանը, գտնվելով ազատության մեջ, որևէ կերպ չի կարող խոչընդոտել իրենց՝ դատավարական պարտականությունները կատարելիս, մինչդեռ՝ խոչընդոտման ռիսկը միակ հիմքն էր, որը դատարանը գտել էր, որ առկա է։ Բացի դա՝ պարզվել է, որ տուժող ճանաչված անձանցից չորսն առհասարակ չեն տուժել ։ Ավելին՝ նույնիսկ հարցաքննության ժամանակ տարակուսանք են հայտնել, թե ինչու են քրեական գործով տուժող ճանաչվել, քանի որ իրենք բացարձակ չեն տուժել։

«Դա հարցաքննված անձանց մասով որպես նոր ի հայտ եկած հանգամանք դիտվեց և դատարանը գրավ կիրառեց՝ գտնելով, որ գրավն ի զորու է ապահովելու պատշաճ վարքագիծը»,- նշեց փաստաբանը։

Նրա փոխանցմամբ՝ Հովսեփյանի մասնակցությամբ շուրջ չորս ամիս որևէ քննչական գործողություն չի իրականացվել՝ պայմանավորված պատերազմական իրավիճակով։

Հիշեցնենք, որ օգոստոսի 31-ից սեպտեմբերի 5-ն ընկած ժամանակահատվածում գրանցվել է ալկոհոլային թունավորման 46 դեպք՝ Արմավիրում, Կոտայքում, Երեւանում, որից 17-ը՝ մահվան ելքով: Դեպքի առթիվ ՀՀ քննչական կոմիտեի Արմավիրի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 279-րդ հոդվածի (անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը) 3-րդ մասի հատկանիշներով: Հովսեփյանին մեղադրանք է առաջադրվել ՀՀ քրեական օրենսգրքի 207-րդ հոդվածի 2-րդ մասով՝ կեղծ օղի արտադրելու կամ իրացնելու համար, որն անզգուշությամբ առաջացրել է մարդու մահ կամ ծանր հետևանքներ։ Քրեական գործով մեղադրանք է առաջադրվել երեք անձի, մասնավորապես, Աշոտ Հովսեփյանին մեղադրանք է առաջադրվել՝ ՀՀ քրեական օրենսգրքի 207-րդ հոդվածի ((կեղծ գինի կամ կեղծ օղի կամ ալկոհոլային կեղծ այլ խմիչք իրացման նպատակով պատրաստելը կամ իրացնելը) 2-րդ մասով: Արշակ Արշակյանին և Ավետիք Վարդանյանին մեղադրանք է առաջադրվել՝ ՀՀ քրեական օրենսգրքի 38-207-րդ հոդվածի (կեղծ գինի կամ կեղծ օղի կամ ալկոհոլային կեղծ այլ խմիչք իրացման նպատակով պատրաստելուն կամ իրացնելուն օժանդակելը) 2-րդ մասով: Երեք մեղադրյալները կալանավորվել են։ Նրանք առաջադրված մեղադրանքները չեն ընդունում։

Հեղինակ՝ Իզաբել Սահակյան

Աղբյուր` Փաստինֆո