Փաստ ինֆո

«ԱՀ նախագահը իշխանությունը հանձնեց Անվտանգության խորհրդի քարտուղար Վիտալի Բալասանյանին»,- այս մասին արժանապատվության երթի ժամանակ ասաց «Մեկ Հայաստան» կուսակցության նախագահ Արթուր Ղազինյանը՝ անդրադառնալով ԱՀ նախագահի հայտարարությանը, թե նախագահի բոլոր հրամանագրերն ու կառավարության որոշումներն ընդունվելու են բացառապես Անվտանգության խորհրդի դրական եզրակացությամբ։

«Ֆորմալ առումով հրաժարական չի ներկայացրել մի պատճառով, որովհետև ռազմական դրության պայմաններում պատերազմը դեռ մինչև վերջ չի ավարտվել, արտահերթ նախագահական ընտրություններ անցկացնելու հնարավորություն օբյեկտիվորեն չկա»,- ասաց Ղազինյանը։

«Մեկ Հայաստան» կուսակցության ղեկավարը նաև նշեց, որ ԱՀ նախագահը կարևոր բացահայտումների մասին էլ է խոսել, որոնցից կարևոր է, որ պատերազմը իրոք հնարավոր էր ավելի շուտ կանգնեցնել։

«Խոստովանեց, որ հնարավոր պատերազմն ավելի շուտ կարող էր կանգնել՝ մեզ համար ավելի ձեռնտու պայմաններով։ Դա առանցքային էր ԱՀ նախագահի կողմից ինքնախոստովանական ցուցմունքում, բայց նա դեռ ամեն ինչ չի ասել, պետք է ասեր թե կոնկրետ ո՞ւմ հրամանով, ցանկությամբ ու պահանջով պատերազմը ավելի շուտ՝ մեզ համար ավելի բարենպաստ պայմաններով չի կանգնեցվել»,- հավելեց Ղազինյանը։

Ըստ «Մեկ Հայաստան» կուսակցության ղեկավարի՝ Արայիկ Հարությունյանը ամրապնդող ցուցմունք ներկայացրեց՝ ապագա քրեկան գործով, որ նաև իր անձնական միջամտությամբ փորձ է եղել կանգնեցնել պատերազմը, ինչին Նիկոլ Փաշինյանը ընդդիմացել է։

«Իմ ունեցած տեղեկություններով դեռ հոկտեմբերի առաջին շաբաթվա ընթացքում է առաջարկությունը արվել՝ կիրառման մեջ դնել Լավրովի ծրագիրը, ինչից Փաշինյանը հրաժարվել է, միգուցե, որովհետև այդ ծրագրում Շուշին հանձնելու կետ չկար»,- ասաց Արթուր Ղազինյանը։

Հիշեցնենք, որ ԱՀ նախագահը դրական պատասխան տվեց այն հարցին, թե հնարավոր էր արդյոք պատերազմը ավելի շուտ ավարտել։ Հարությունյանը նաև հայտարարել է, որ որոշել է հրաժարվել «Ազատ հայրենիք» կուսակցության նախագահի պաշտոնից, պատրաստ է հրաժարական տալ առաջին իսկ հնարավորության դեպքում։

Աղբյուր` Փաստինֆո