Փաստ ինֆո

Փաշինյանի հրաժարականի պահանջով քայլերթ իրականացնող քաղաքացիները ՀՀ գլխավոր դատախազից պահանջում են հանձնարարել՝ մինչև վաղը ժամը 17։00-ն տրամադրել տեղեկատվություն, թե արդյո՞ք Մովսես Հակոբյանի հայտարարությունների առթիվ ՀՔԾ-ում քննվող քրեական գործի շրջանակներում Նիկոլ Փաշինյանը հարցաքննվել է, թե ոչ և, եթե այո, ապա ինչ դատավարական կարգավիճակով է հարցաքննվել և ինչ է հաջողվել պարզել։ Եթե չի հարցաքննվել, ապա պահանջում են ներկայացնել, թե ինչ պատճառով։ Այս մասին հայտարարեց «Մեկ Հայաստան» կուսակցության ղեկավար Արթուր Ղազինյանը։

Բացի դա՝ Ղազինյանը դատախազությունից տեղեկություն է պահանջում այն մասին, թե արդյոք Մովսես Հակոբյանի մատնանշած ձայնագրությունը քննության առարկա դարձել է, թե ոչ և, եթե այո, ապա ինչ է հաջողվել պարզել դրա արդյունքում, եթե ոչ՝ ինչու չի դարձել քննության առարկա։

«Առգրավվել է արդյոք Մովսես Հակոբյանի հիշատակած թիվ 00038 գաղտնի հրամանը, որով վերացվել է 5 մարտական գունդ, դադարեցվել է ԶՈՒ լրահամալրումը։ Պարզվել է արդյոք, թե ովքեր են ներկա գտնվել զորքերի լրահամալրումը դադարեցնելու վերաբերյալ Նիկոլ Փաշինյանի մոտ տեղի ունեցած քննարկմանը, ով ինչ կարծիք է հայտնել դրա վերաբերյալ։ Հիշյալ հարցի շուրջ հարցաքննվել է արդյոք ՀՀ ԶՈՒ ԳՇ պետ Օնիկ Գասպարյանը, թե ոչ»,- նշեց Ղազինյանը՝ հետաքրքրվելով, թե պարզվել է արդյոք, թե ԳՇ պետի տագնապային կանխատեսումների պայմաններում ինչպես է հաջողվել լրահամալրումը կասեցնելուն, ինչ նպատակով և ում շահերից է բխում նշված հրամանը։

Գլխավոր դատախազության շենքի դիմաց հավաքված երթի մասնակիցները՝ ոստիկանների միջոցով ՀՀ գլխավոր դատախազ Արթուր Դավթյանին փոխանցեցին նամակը, ինչից հետո լրագրողների հետ զրույցում «Մեկ Հայաստան» կուսակցության ղեկավար Արթուր Ղազինյանը նշեց. «Հարցերին տրվելիք պատասխանները էապես լույս կսփռեն Հայաստանի պատմության մեջ ամենածանր հանցագործության՝ առանձին դետալների վրա, որովհետև Նիկոլ Փաշինյանի կողմից Զինված Ուժերի լրահամալրումը հանգեցրել է ծայրահեղ աղետալի վիճակին՝ կանոնավոր բանակից անցում կատարելով դեպի ջոկատային պայքարի՝ աշխարհազորի։ Փաստացի այդ հրամանով տեղի է ունեցել Հայաստանի ազգային բանակի կազմաքանդում՝ հետևաբար դատախազությունից կսպասենք պատասխանների»։

Ղազինյանը հավելեց, որ նամակում նշված է նաև Մովսես Հակոբյանի հայտարարությունների մասին։

Հիշեցնենք, որ ՀՔԾ-ից հայտնել են, որ գործով որևէ ձայնագրություն չեն ստացել։

«Դիմել ենք գլխավոր դատախազին, իրավունք ունի պահանջ ներկայացնելու։ Կարծում եմ, քննիչը նրան կզեկուցի գործի մանրամասները և մենք վաղը կիմանանք պատասախանները»,- հավելեց Ղազինյանը և նշեց, որ հույս ունի՝ դատախազությունը կգտնվի և կպատասխանի ՀՀ հազարավոր քաղաքացիներին հետաքրքրող հարցերին։ Ղազինյանը նշեց, որ ինքը նշված քրեական գործով որևէ դատավարական կարգավիճակ չունի, սա հանրային պահանջ է ՝ ուղղված գլխավոր դատախազին։

Աղբյուր` Փաստինֆո