Փաստ ինֆո

Երևանի ընդհանուր իրավասության դատարանը՝ դատավոր Տաթևիկ Ստեփանյանի նախագահությամբ, հեռացել է խորհրդակցական սենյակ՝ Յուրի Խաչատուրովն ընդդեմ Ստեփան Գրիգորյանի գործով վճիռ կայացնելու։ Դատարանի որոշումը կհրապարակվի 2021 թվականի հունվարին։ Այս մասին «Փաստինֆո»-ն տեղեկացավ Յուրի Խաչատուրովի ներկայացուցիչ, փաստաբան Անահիտ Սարգսյանից։

Նշենք, որ դատարանը դեռևս սեպտեմբերին կայացած դատական նիստին նոյեմբերի 16-ը ժամանակ էր տվել կողմերին՝ ապացույցները ներկայացնելու համար, որն իրականացվել է պատշաճ կարգով։

Փաստաբան Սարգսյանը հայտնեց, որ պատասխանող կողմը ներկայացրել է ապացույցներ, որոնք ստացել էին ԳՇ պետին ուղարկված հարցման արդյունքում։

«Ըստ էության՝ նույն հարցումն էր, որը մենք արել էինք, ունեինք և նույն պատասխանն էլ ստացվել է, որ տվյալ օրը՝ մինչև ժամը 23։15 Յուրի Խաչատուրովը եղել է աշխատավայրում, որից հետո հարձակումը եղել է գիշերը՝ 02։50-02։55-ի սահմաններում և անմիջապես տեղյակ է պահվել Խաչատուրովը, 10-15 րոպե հետո եղել է աշխատավայրում։ Մյուս հարցն էլ վերաբերում էր նրան՝ արդյոք նա բացակայել է այդ ընթացքում հրամանատարական կետից, ինչին ի պատասխան հայտնել են, որ մեկ օր է միայն բացակայել՝ ապրիլի 4-ին մի քանի ժամով՝ երկրի նախագահի թույլտվությամբ։ Գնացել է Մոսկվա, որտեղ հանդիպում է եղել Ադրբեջանի և ՌԴ ԳՇ պետերի հետ։ Իր բացակայությունը եղել է այդ ժամանակահատվածում»,- հայտնեց փաստաբանը՝ հավելելով, որ պատասխանող կողմը նաև հարցում է արել Անդրանիկ Քոչարյանին՝ Ապրիլյան քննիչ հանձնաժողովում Յուրի Խաչատուրովի մասնակցության մասին, որի պատասխանն այդպես էլ, ըստ էության, չի ստացվել, վերջինս միայն հայտնել էր, որ Ապրիլյան պատերազմին մասնակցած բոլոր բարձրաստիճան պաշտոնյաները կանչվելու են, հարցաքննվելու են։

Այլ կերպ ասած՝ պատասխանող կողմի ներկայացրած ապացույցները հերքում են հենց Գրիգորյանի հայտարարությունները՝ Յուրի Խաչատուրովի վերաբերյալ։

Բացի դա՝ պատասխանող կողմն ամբողջ դատական պրոցեսի ընթացքում այդպես էլ չի պնդել իր հայտարարությունները, ամբողջ 2 տարվա ընթացքում փորձում էին հիմնավորել, որ Գրիգորյանը ենթադրել է, կասկածել է և իր կասկածներն է հայտնել, սակայն Սարգսյանն արձանագրեց, որ և՛ ՀՀ օրենսդրությունը, և ՄԻԵԴ նախադեպերն ասում են, որ նույնիսկ կարծիքի դեպքում պետք է բավարար փաստական հիմք առկա լինի։

«Եթե դու հայտնում ես քո կարծիքը, որը կարող է ինչ-որ մեկի բարի համբավը վնասել, ապա պետք է փաստարկները լինեն բավարար փաստարկված, ներկայացված լինեն բարեխիղճ և հավասարակշռված, որն այս դեպքում առկա չէ»,- նշեց փաստաբանը՝ ավելացնելով, որ զրպարտելով սպաներին՝ վարկաբեկում ենք նաև հայկական բանակը։

Փաստաբան Անահիտ Սարգսյանն այս հանգամանքը կարևորել է նաև դատական նիստի ընթացքում՝ նշելով, որ, թեև ինքը ներկայացնում է Յուրի Խաչատուրովի շահերը և հայց է ներկայացվել՝ ֆիզիկական անձի պատիվն ու արժանապատվության պաշտպանության, բայց հայցը նաև բանակի պաշտպանությանն է վերաբերում, քանի որ խոսքերը, որոնք ասվել են Յուրի Խաչատուրովի հասցեին, վարկաբեկում է բանակը, կազմաքանդում բանակը, նսեմացնում հանրության վստահությունը՝ բանակի նկատմամբ։

Հատկապես ստեղծված իրավիճակը շատ լավ ցույց է տալիս, թե ինչի հանգեցրին նման հայտարարությունները՝ թե մեր գեներալների, հրամանատարների, թե բանակի նկատմամբ արված, դրանք հանգեցրել են ողբալի վիճակի։

«Դեռևս 2018թ-ին՝ ներկայացնելով հայցը, փորձում էինք կանխել այս աղետը, որը տեղի ունեցավ»,- նշեց Սարգսյանը՝ հավելելով, որ տարիներ շարունակ այս ամենն ուղղորդվել է դրսի ուժերից, ծառայություններից՝ բանակը թուլացնելու համար։

Ըստ Սարգսյանի՝ դա մեծ ծրագրի մաս էր և չի կարծում, որ Ստեփան Գրիգորյանը պատահաբար է որոշել, որ պետք է հայտարարի, թե հողերը ծախել է Խաչատուրովը, պետք է ստուգել նրա և նրա հարազատների հաշիվները։ Սարգսյանի խոսքով՝ դա միամիտ արվող հայտարարություն չէր, կանխամտածված էր։

Հիշեցնենք, որ ՀԱՊԿ նախկին քարտուղար, ՀՀ ԶՈՒ ԳՇ նախկին պետ Յուրի Խաչատուրովը քաղաքագետ Ստեփան Գրիգորյանի դեմ հայցադիմում է ներկայացրել՝ պահանջելով հերքել զրպարտություն հանդիսացող տվյալները և 2 մլն դրամի չափով փոխհատուցում։

Հայցադիմումի պատճառ է դարձել 2018թ մայիսի 30-ին Գրիգորյանի կողմից ասուլիսներից մեկի ընթացքում արված հայտարարությունները, որով, ըստ Խաչատուրովի Գրիգորյանն արատավորել է իր պատիվն ու արժանապատվությունը։ Նշենք, որ Գրիգորյանի հայտարարությունը վերաբերում է 2016թ Ապրիլյան պատերազմի ընթացքում Յուրի Խաչատուրովի գործողություններին։

Հեղինակ՝ Իզաբել Սահակյան

Աղբյուր` Փաստինֆո