Փաստ ինֆո

Արցախի նախագահի ուղերձում մեկ նախադասություն պետք է հնչեր՝ պատերազմի արդյունքում մենք պարտվել ենք, ես հրաժարական եմ տալիս, մնացած երկարաշունչ տեքստն անիմաստ էր: «Փաստինֆո»-ի հետ զրույցում նման տեսակետ հայտնեց քաղտեխնոլոգ Արմեն Բադալյանը՝անդրադառնալով Արցախի նախագահ Արայիկ Հարությունյանի այսօրվա տեսաուղերձին:

Քաղտեխնոլոգը նկատում է՝ ԱՀ նախագահի ուղերձում կար միտք այն մասին, որ հիմա նոր ընտրություններ չեն կարող լինել և իր լիազորությունները կիսում է ԱԽ քարտուղար Վիտալի Բալասանյանի հետ, այսինքն՝ իր լիազորությունները որոշակիորեն սահմանափակվում են:

Անդրադառնալով Արցախի նախագահի այն հայտարարությանը, որ թեեւ Սահմանադրությամբ Հանրապետության նախագահը զինված ուժերի գերագույն գլխավոր հրամանատարն է, ապա ու՞մ համար է գաղտնիք, թե իրականում Պաշտպանության բանակն ինչպես ու որտեղից է կառավարվում և թե որքանով է Արցախի Հանրապետության նախագահն ընդգրկված այդ գործընթացներում՝ քաղտեխնոլոգն ասաց.

«Արցախի նախագահը բավական շատ լիազորություններ ուներ պատերազմի ժամանակ, այդ լիազորությունների սակավությունը չէ պատճառը, որ ինքը 10 օր շարունակ դիմում էր Հայաստանին՝ ռազմամթերք ուղարկելու համար,որն այդպես էլ չուղարկվեց, իսկ ինքը դրա մասին լռում էր, այստեղ լիազորությունների սահմանափակման հարց գոյություն չունի»,-ասաց Արմեն Բադալյանը:

Փորձագետը արձանագրում է՝ Արայիկ Հարությունյանը վարում է նույն քաղաքականությունը, ինչ Հայաստանում է՝ բոլորը մեղավոր են՝ բացի իրենից.

«Արայիկ Հարությունյանը մեղավոր է Արցախի խնդրում, քանի որ լսեց Հայաստանի իշխանություններին և չգործեց որպես ինքնուրույն քաղաքական գործիչ, այլ դարձավ Հայաստանի իշխանության դրածոն Արցախում, նախկինում, երբեմն, եղել են տարաձայնություններ Արցախի և Հայաստանի ղեկավարների միջև , որովհետև տարբեր հարցերի վերաբերյալ Արցախի իշխանությունն ունեցել է իր դիրքորոշումը, իսկ Արցախի գործող նախագահը միակն էր, որ որևիցե դիրքորոշում չուներ, բացի ՀՀ վարչապետի դիրքորոշումից։ Իհարկե, թիվ մեկ պատասխանատուն Նիկոլ Փաշինյանն է, երկրորդը՝ Արցախի նախագահը»,-ասաց Բադալյանը՝ հավելելով, որ Արայիկ Հարությունյանը մեղավոր է իր վարած սխալ կադրային քաղաքականությամբ և շատ խնդիրների մասին չի բարձրաձայնել.

«Նա բոլոր հարցերում լսել է ՀՀ իշխանություններին, ինչը բնավ պետք չէր, չի հակադարձել Հայաստանի իշխանությունների այն տեսակետին, որ՝ «Արցախը Հայաստան է և վերջ», չի ասել ՝ոչ, Արցախը Արցախը է, իսկ Հայաստանը՝ Հայաստան»:

Փորձագետը նաև ենթադրում է, որ Արցախի նախագահը այս խնդիրների մասին ավելի վաղ չի բարձրաձայնել, քանի որ, հավանաբար կարծել է, որ գուցե խուսափի պատասխանատվությունից, բայց այդպես չէ բոլորը պատասխանատվության առջև են կանգնում.

«Այսօր Արցախի ղեկավարության վրա Հայաստանը ոչ մի ազդեցություն չունի, այնտեղ արդեն ուժեղ է ռուսական ազդեցությունը, ինչը նշանակում է՝այնտեղ ոչ թե նախագահն է նշանակումներ կատարում, այլ՝ ուրիշ քաղաքական գործընթացներ են տեղի ունենում, որտեղ արդեն ուժեղ է Ռուսաստանի ազդեցությունը»-ասաց Արմեն Բադալյանը

Աղբյուր` Փաստինֆո