Փաստ ինֆո

Ինչո՞ւ իրավիճակը հասավ նրան, որ անհետ կորած և գերեվարված զինծառայողների ծնողները, շաբաթներ շարունակ այս կամ այն պետական կառույցի ու դեսպանատների դիմաց իրենց զավակներին գտնելու հույսը կորցրած, այսօր հավաքվեցին Պաշտպանության նախարարության դիմաց և փորձեցին ուժի կիրառմամբ ճեղքել գերատեսչության դարպասը՝ իրենց զավակների մասին որևէ տեղեկություն ստանալու համար: Ի պատասխան, իրավապաշտպան Ռուբեն Մելիքյանը «Փաստինֆո»-ի հետ զրույցում նկատում է՝ ունենք մի իշխանություն, որի սնանկության աստիճանը կարող է այսօրինակ ծայրահեղ քայլերի մղել շաբաթներ շարունակ իրենց որդիներին փնտրող հուսահատ ծնողներին. «Օրվա իշխանությունների համար իր քաղաքացու կյանքը բացարձակ զրոյական արժեք ունի:

Նա որևէ անգամ շիտակ պատասխան չտվեց իր զավակների որպիսությամբ հետաքրքվող և շաբաթներ շարունակ այս գերատեսչությունից այն գերատեսչություն վազող ծնողին: Այսքանից հետո, բնական էր, որ մարդկանց նյարդերը կարող էին տեղի տալ և, փաստորեն, տվեցին: Ես ինձ իրավունք չեմ վերապահի որևէ գնահատական տալ այդ մարդկանց գործողություններին, որովհետև մենք բոլորս, առնվազն, բարոյական պարտք ունենք այդ մարդկանց նկատմամբ: Նրանք հայրենիքի փրկության համար տվել են իրենց ունեցած ամենաթանկ բանը՝ զավակին և արդյունքում, այս պահի դրությամբ, չկա որևէ մեկը, ով ինչ – որ կերպ կփարատի այդ մարդկանց տառապանքը՝ անվերջ թվացող սպասումի օրերը: Երևի այս մարդիկ հիմա ամենավատ վիճակում գտնվողներն են, որովհետև չգիտեն՝ կենդանի՞ են արդյո՞ք իրենց զավակները, թե՞ ոչ: Միայն կարող եմ ասել, որ այս ամենի թիվ մեկ և գլխավոր պատասխանատուն ոչ թե Պաշտպանության նախարարությունն է, այլ, այսպես կոչված՝ գերագույն գլխավոր հրամանատարը, ով նաև այս խայտառակ ձախողման հեղինակն է ու, ով, առանց ամաչելու, նույնիսկ իր ստորագրած կապիտուլյացիայից 40 օր անց, գրկել ու նստել է աթոռը»,- ասում է իրավապաշտպան Ռուբեն Մելիքյանը:

Անդրադառնալով նախօրեին Բաքվից 44 գերեվարված զինվորականների վերադարձին անմիջապես հաջորդած՝ 171 նոր գերեվարության և նրանցից 11-ի սպանության դրվագին, իրավապաշտպանը նկատում է՝ սա նույնպես օրվա քաղաքական իշխանության սնանկության խայտառակ արդյունք է և այն, դժբախտաբար, կանգ չի առնելու, քանի դեռ սրանք վայր չեն դրել իրենց լիազորությունները՝ հնարավորություն տալով նոր կազմված իշխանությանը կանգնեցնելու աղետը. «Ցավոք, մենք թշնամուն ցույց տվեցինք, որ մինչ այսօր չունեինք բավարար չափով արժանապատվություն, որպեսզի հեռացնեինք դավաճանության ճանապարհով մեզ հայրենազրկման հասցրած այս իշխանությանը, սրանով իսկ, սաստելով ադրբեջանական կողմի վայրագ ամենաթողության դրսևորումները:

Հետևաբար, ամենևին տարօրինակ չէ, որ տեսնելով Հայաստանում այս պահին տիրող անարժանապատիվ վիճակը, Ադրբեջանը դեռ շատ բարբարոսություններ կիրականացնի: Թեպետ, այսքանից հետո անգամ, նույն այդ թշնամուն ուզում եմ տեղյակ պահել, որ իրենց համար անգին այս գտածոն շուտով զիջելու է իր դիրքերը, իսկ մենք հետ ենք վերադարձնելու մեր կորցրած ազգային արժանապատվությունն ու երբեմնի փառահեղ հաղթանակները: Սրանում Ադրբեջանում որևէ մեկը որևէ կասկած չպետք է ունենա»- եզրափակում է զրույցը Ռուբեն Մելիքյանը:

Հեղինակ՝ Նվարդ Մանվելյան

Աղբյուր` Փաստինֆո