Փաստ ինֆո

Պատերազմի թեժ օրերին, երբ թվում էր, թե ռազմական գործողությունները միայն առաջնագծում են՝ պետական մարմինների կողմից երբեմն-երբեմն տեղեկություններ էին տարածվում, որոնք խուճապ էին առաջացնում ՀՀ բնակչության, այդ թվում՝ երեւանցիների շրջանում։ Այդ տեղեկությունների շարքին են դասվում նաեւ անհասկանալի պայմաններում Գեղարքունիքում կործանված ՀՀ զինված ուժերի ռազմական ինքնաթիռը, ընդհուպ Երեւանի մատույցներում խոցված հակառակորդի 4 ԱԹՍ-ները։

Հիշեցնենք՝ դեռևս հոկտեմբերի մեկին Նիկոլ Փաշինյանը հայտարարեց, թե թշնամական չորս անօդաչու թռչող սարք է հայտնվել Կոտայքի եւ Գեղարքունիքի մարզերի օդում։
«Հայաստանի ՀՕՊ ուժերը արդեն իսկ ոչնչացրել են դրանից երեքին: Ընթանում է չորրորդի տեղորոշման եւ չեզոքացման գործընթացը»,- ֆեյսբուքում գրել էր Փաշինյանը, ապա րոպեներ անց ավելացրել՝ «չորրորդն էլ ոչնչացվեց»։ Ավելի ուշ հայտարարությամբ էր հանդես եկել նաեւ ՀՀ ԱԳՆ-ն՝ նշելով, որ «ՀՀ օդային տարածք են ներխուժել հակառակորդի ԱԹՍ-ները և հետախուզական թռիչքներ իրականացրել ՀՀ մայրաքաղաք Երևանի մոտակայքում: Բոլոր ԱԹՍ-ները ՀՕՊ կողմից ոչնչացվել են»:

Ռազմական գործողությունների թեժ վայրում խոցված անգամ յուրաքանչյուր ԱԹՍ-ի մասին ՀՀ ռազմական գերատեսչությունը տեղեկություն էր հրապարակում՝ նշելով, թե ինչ արտադրության են, որտեղ են խոցվել ու որպես հավաստում լուսանկար կցում։ Մինչդեռ «Երեւանի մոտակայքում» խոցված ԱԹՍ-ների մասին որեւէ փաստացի տվյալ չհրապարակվեց՝ երեւանցիներին թողնելով միայն խուճապը, քանի որ հասկացան, որ թշնամու ԱԹՍ-ները կարող են հասնել ընդհուպ մայրաքաղաքին ու չհասկացան, թե ինչու ՀԱՊԿ-ը չմիջամտեց, եթե հակառակորդը ոտնձգություն էր կատարել Հայաստանի տարածքային ամբողջականության դեմ։

«Փաստինֆոն» դեռեւս նոյեմբերի 21-ին գրավոր հարցմամբ դիմել է ՀՀ պաշտպանության նախարարությանը՝ խնդրելով ի թիվ այլ հարցերի տեղեկություն տրամադրել նաեւ, թե «Երեւանի մոտակայքում» կոնկրետ որտեղ են խոցվել հակառակորդի՝ հոկտեմբերի 1-ին ներխուժած 4 ԱԹՍ-ները, որոնց մասին հայտարարել էր Նիկոլ Փաշինյանն անձամբ, ու ինչ արտադրության են դրանք եղել։ Պարզվում է՝ ՊՆ-ում անտեղյակ են։ Մի քանի բանավոր հիշեցումից հետո «Փաստինֆո»-ն գրություն ստացավ, թե հարցին պատասխանելու համար լրացուցիչ ուսումնասիրության անհրաժեշտություն ունեն։ Այսինքն՝ ՊՆ-ն առ այսօր չգիտի, թե հոկտեմբերի 1-ին մինչեւ ուր են ներթափանցած եղել հակառակորդի ԱԹՍ-ները։

Դե ինչ, մնացել է 6 օր՝ օրենքով սահմանված 1-ամսյա ժամկետը լրանալու համար։ Հուսանք՝ այս օրերին ՊՆ-ն կուսումնասիրի ու մեր հարցմանը կտա լիարժեք պատասխան՝ փարատելով հնարավոր կեղծ տեղեկատվության վերաբերյալ բոլոր կասկածները։

Աղբյուր` Փաստինֆո