Փաստ ինֆո

«Հայաստանի իշխանությունները մեդիաբլոկադայի են ենթարկել Արցախն ու Սյունիքը: Չկա հստակ ինֆորմացիա այն մասին, թե ի՞նչ է կատարվում Արցախում, անհասկանալի պրոցեսներ են տեղի ունենում նաև Սյունիքում, որոնք, առավել հաճախ հերքվում են, ընդ որում, այնքան մանիպուլյատիվ կերպով, որ կարելի է ասել՝ հերքվելով էլ հաստատվում են: Այս ամենի արդյունքում, հանկարծ պարզվում է, որ իրականությունն ավելի վատ է եղել, քան սկզբում էր թվում»,- «Փաստինֆո»-ի հետ զրույցում ասել է ռազմական փորձագետ Կարեն Վրթանեսյանը՝ անդրադառնալով Արցախում և Սյունիքի սահմաններին ստեղծված իրավիճակին:

Հարցին՝ ի՞նչ նպատակ է հետապնդում իշխանության որդեգրած այս քաղաքականությունը, Կարեն Վրթանեսյանը պատասխանում է՝ իշխանությունը հասկանում է, թե ինչ կարգի ցասում է բորբոքել հասարակության մեջ իր նկատմամբ և այս կերպ փորձում է մի քանի օր էլ ձգել իր տխրահռչակ գոյությունը. «Այս իշխանության առաջին և լուրջ մեծամասշտաբ տապալումը կորոնավիրուսային վարակի դեմ պայքարն էր, որը նրանք տանուլ տվեցին համավարակի հենց առաջին ամիսներին: Արդյունքում, մենք ունեցանք ոչ միայն համավարակի անվերահսկելի տեմպեր ու ծավալներ, այլ նաև՝ քայքայված տնտեսական համակարգ: Դեռ համավարակը չհաղթահարած, իշխանության վարած ապաշնորհ արտաքին քաղաքականության արդյունքում, երկիրը նոր և դաժան պատերազմի մեջ մտավ: Թե ինչպե՞ս մեզ համար անցավ այդ պատերազմի ողջ ընթացքն ու թե ի՞նչ ավարտ ունեցավ այն հայկական կողմի համար, գիտենք: Այսքանով հանդերձ, իշխանությունը հետպատերազմյան Հայաստանում զբաղված է բացառապես ոչինչ չանելով: Պետական համակարգը կանգնած է, ոչ ոք ոչինչ չի անում: Արդյունքում, այն ցասումը, որ կա և հավաքվել է ժողովրդի մեջ, այլևս պայթունավտանգ է և իշխանությունն այս ամենը ոչ միայն տեսնում, այլ նաև շատ լավ հասկանում է: Միաժամանակ հասկանում է նաև, որ իրավիճակն այսպես շարունակվել այլևս չի կարող և այն կարող է իրենց համար անվերահսկելի շրջադարձ ունենալ»,- նկատում է Կարեն Վրթանեսյանը:

Վերլուծելով ադրբեջանական կողմի որդեգրած վարքը, Կարեն Վրթանեսյանը նկատում է՝ տեսնելով, թե ինչ իրավիճակ է տիրում այստեղ՝ Հայաստանում, Ադրբեջանը փորձում է մաքսիմալ օգուտ քաղել դրանից և հնարավորինս իր օգտին բարելավել դիրքերը՝ ոչ միայն Արցախում, այլ նաև, արդեն Հայաստանի Հանրապետության հարավային սահմաններին. «Այնինչ, նույնիսկ արդեն հայտնի խայտառակ կապիտուլացիոն պայմանագրով, Հայաստանի սահմանների վերաբերյալ որևէ խոսք չի գնացել, բացի այն ճանապարհահատվածից, որ կապելու է Մեղրին ու Նախիջևանը: Տեսնելով այս իշխանությունների անկարողությունը, Ադրբեջանն անում է այն, ինչ բխում է իր և մասամբ նաև Թուրքիայի շահերից, ընդ որում՝ ոչ միայն տարածքային առումով, այլ նաև քաղաքական և դիվանագիտական ձեռքբերումների հաշվին նույնպես»:

Ինչի՞ արդյունք կարող է լինել իշխանության նման վարքը: Ռազմական փորձագետը նկատում է՝ նրանք բացառապես կենտրոնացած են միայն մի խնդրի լուծման ուղղությամբ և դա՝ ամեն կերպ և ամեն գնով վերարտադրվելու օրակարգն է: Ռազմական փորձագետն ընդգծում է՝ մենք տեսանք, թե ինչպես իրականությունը քողարկելու նպատակով, նրանք, ողջ թիմով մի նորահայտ տերմին գցեցին շրջանառության մեջ՝ մեդիատեռոր ասվածը, որով, ի դեպ, տարիներ շարունակ, ինչպես նաև հիմա, ինքը Նիկոլ Փաշինյանն է զբաղվել և զբաղվում: Դա նրա աշխատելու ոճն է, իր ձեռագիը, բայց ոչ հակառակ բևեռինը: «Հայաստանի համար թիվ մեկ մեդիատեռորիստը Նիկոլ Փաշինյանն է», ասում է Կարեն Վրթանեսյանը:

Հարցին՝ ինչո՞ւ պատերազմի ավարտից ավելի քան մեկ ամիս անց, հայկական կողմը չունի պաշտոնական վիճակագրություն այն մասին, թե քանի՞ զոհ, վիրավոր, անհետ կորած և գերեվարված զինծառայող և աշխարհազորային ունենք: Ռազմական փորձագետը պատասխանում է՝ սա նույնպես իշխանությունների որդեգրած անթույլատրելի մեդիաքաղաքականության մի դրսևորում է՝ տոտալ անորոշության մթնոլորտ ստեղծել՝ փորձելով իրավիճակը մանիպուլացնել իր օգտին, տվյալ դեպքում՝ ծառայեցնել այն վերարտադրվելու կամ, գոնե մի որոշ ժամանակ ևս իշխանության ղեկին մնալու համար. «Չմոռանանք, թե մինչև ո՞ւր գնաց Նիկոլ Փաշինյանը, գերեվարվածների և անհետ կորածների ծնողների և հարազատների հետ հանդիպման ընթացքում: Ակնհայտ կերպով, նա պարզապես գործարք էր առաջարկում իրենց զավակներին կորցրած ծնողներին՝ չշարունակել պայքարել իշխանության դեմ և այդ պայմանով՝ ինքը կփորձի ինչ – որ կերպ լուծել անհետ կորածների կամ գերեվարվածների խնդիրը: Ահա սա է այդ մարդը, և սա է այն իրականությունը, որում հայտնվել է պետությունը՝ այդ մարդու վարած, այսպես ասած, քաղաքականության արդյունքում»,- եզրափակում է զրույցը Կարեն Վրթանեսյանը:

Հեղինակ՝ Նվարդ Մանվելյան

Աղբյուր` Փաստինֆո