Փաստ ինֆո

Վերաքննիչ քրեական դատարանը՝ դատավոր Արմեն Դանիելյանի նախագահությամբ, մերժեց ՀՀԿ անդամ, ԱԺ նախկին պատգամավոր Վահրամ Բաղդասարյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը մերժելու որոշման դեմ դատախազության բողոքը՝ ուժի մեջ թողնելով առաջին ատյանի դատարանի որոշումը։ Այսինքն՝ Վահրամ Բաղդասարյանը չի կալանավորվի։  Այս մասին «Փաստինֆո »֊ն տեղեկացավ պաշտպան Ռուբեն Հակոբյանից։

Նշենք, որ Երևանի ընդհանուր իրավասության դատարանը մերժել էր Բաղդասարյանին կալանավորելու մասին միջնորդությունը՝ հիմնավոր կասկածի բացակայության հիմքով և կալանավորման հիմքերին անգամ չէր անդրադարձել։ Այդուհանդերձ դատախազը վերաքննիչ բողոքում անդրադարձել էր նաև կալանավորման հիմքերին, սակայն, հաշվի առնելով, որ ընդհանուր իրավասության դատարանը չի անդրադարձել կալանավորման հիմքերին պաշտպանն առարկել է՝ բողոքի շրջանակներում կալանավորման հիմքերին անդրադառնալու մասին դատախազի պնդումներին։

Պաշտպանը նշեց, որ դեռևս դատարանի որոշումը չի ստացել, ուստի չի կարող ասել ՝ դատարանն արդյոք անդրադարձել է հիմքերին, թե ոչ։

Հիշեցնենք, որ Արցախի հողերի մեծ մասը Ադրբեջանին հանձնելու Փաշինյանի որոշման դեմ Երեւանում սկսված բողոքի ակցիաներին զուգահեռ իշխանություններն անցել են զանգվածային քաղաքական հետապնդումների՝ հարուցվել են քրեական գործեր՝ բողոքի ակցիաներ կազմակերպելու, ապա նաեւ՝ Փաշինյանի ենթադրյալ սպանությունը նախապատրաստելու հատկանիշներով։ Մի քանի տասնյակ ընդդիմադիր եւ հասարակական գործիչ ձերբակալվել է, որոնցից մի մասին նաեւ մեղադրանքներ են առաջադրվել՝  օրենքի խախտմամբ հավաքներ կազմակերպելու և անցկացնելու, իսկ Արթուր Վանեցյանին, Վահրամ Բաղդասարյանին և Աշոտ Ավագյանին, նույն ջոկատի լեգենդար հրամանատար Աշոտ Մինասյանին՝ նաեւ իշխանության յուրացման, Փաշինյանի ենթադրյալ սպանության նախապատրաստման, ապօրինի զենք զինամթերք պահելու համար։ Նրանց կալանավորելու միջնորդություններ է ներկայացվել դատարաններ, որոնք մերժվել են։ Դատախազությունը բողոքարկել է դատական ակտերը՝ պահանջելով կալանավորել վերջիններիս։

Հեղինակ՝ Իզաբել Սահակյան

Աղբյուր` Փաստինֆո