Փաստ ինֆո

Խոսքի ազատության պաշտպանության կոմիտեի աշխատակից Հասմիկ Բուդաղյանը հրապարակել է ոստիկանությունից՝ «Երկիր Մեդիա» ՀԸ օպերատոր Հայկ Սուքիասյանի հանդեպ կիրառված ոստիկանական բռնության առնչությամբ հարցման պատասխանը։

«Լրագրողական 10 կազմակերպություններ դեկտեմբերի 2-ին հանդես էին եկել հայտարարությամբ՝ նախորդ օրը կազմակերպված ակցիայի ընթացքում  «Երկիր Մեդիա» ՀԸ օպերատոր Հայկ Սուքիասյանի հանդեպ կիրառված ոստիկանական բռնության առնչությամբ։

Ոստիկանության ներքին անվտանգության վարչությունից դեկտեմբերի 8-ին Խոսքի ազատության պաշտպանության կոմիտեին հայտնել էին, որ այդ դեպքով ծառայողական քննություն է ընթանում, իսկ այսօր ԽԱՊԿ-ը նամակ ստացավ նույն վարչությունից, որում մասնավորապես ասվում է, որ ծառայողական քննությամբ Հայկ Սուքիասյանի լրագրողական գործունեությունը խոչընդոտելու հանգամանքը չի հաստատվել։

«Պարզվել է, որ բողոքի ակցիայի ժամանակ Հայկ Սուքիասյանը դրսևորել է ակտիվ վարքագիծ, հրմշտել է ոստիկանության ծառայողներին՝ ցանկանալով դուրս գալ դեպի ճանապարհի երթևեկելի հատվածի կենտրոնական մաս, ուստի ոստիկանության ծառայողները, համաչափ ֆիզիկական ուժ կիրառելով՝ վերջինիս նստեցրել են պարեկային ավտոմեքենայի մեջ, որտեղ ճշտվել է, որ այդ քաղաքացին «Երկիր Մեդիա»-ի աշխատակից է, որից հետո նրան անմիջապես իջեցրել են պարեկային ավտոմեքենայից։ Միաժամանակ պարզվել է, որ Հայկ Սուքիասյանի տեսախցիկը չի վնասվել, այլ միջադեպի օրը խառնաշփոթի հետևանքով մի պահ կորցրել է ուղիղ հեռարձակման համար նախատեսված սարքը (մոդեմը), որը հետագայում գտնվել և վերադարձվել է իրեն։

Վերոգրյալի կապակցությամբ ծառայողական քննության արդյունքները թողնվել են անհետևանք»։

Նշեմ, որ ԽԱՊԿ-ն այս դեպքը ներառել է իր տարեկան զեկույցում՝ որպես ֆիզիկական ճնշում։

Ավելի վաղ՝ «Ազատություն» ՌԿ վրա հարձակման առնչությամբ արված նոյեմբերի 10-ի հայտարարությունից հետո էլ Ոստիկանությունից ԽԱՊԿ-ին հայտնել են, որ կատարվածի առնչությամբ հետաքննություն է ընթանում, իսկ նոյեմբերի 23-ին Ոստիկանության Երևան քաղաքի վարչության կենտրոնական բաժնից հայտնել են, որ գործն ուղարկվել է ԱԱԾ Քննչական դեպարտամենտ՝ իրենց վարույթում գտնվող քրեական գործին կցելու և հետագա ընթացքը որոշելու համար»։

Աղբյուր` Փաստինֆո