Փաստ ինֆո

Ինձ հայտնի չէ պատմության մեջ մի դեպք, երբ մարդ, որը կապիտուլյացիայի պայմանագիր է ստորագրել, չի հեռանում ու ասում է, որ պատրաստ է քաղաքական պատասխանատվություն կրել։ Այս մասին լրագրողների հետ զրույցում ասաց ՀՀԿ ԳՄ անդամ Էդուարդ Շարմազանովը՝ նշելով, որ քաղաքական պատասխանատվությունը՝ հրաժարականն է։

«Ամբողջ աշխարհում մարդիկ նույնիսկ կոռուպցիոն փոքր սխալների համար հրաժարական են ներկայացնում։ Իսկ նա Արցախի 75 տոկոսը տվել է, Մեղրիով Նախիջևան ճանապարհ է տվել, 44 օր խաբել է բոլորիս, որ հաղթում ենք, 5000 զոհ է տվել, 10000-ից ավել վիրավոր և ասում է՝ պատրաստ է իր պարտականությունները կատարել։ Մենք վճռական ենք լինելու՝ պարտադրելու Նիկոլին հրաժարական տալ»,-ասաց Էդուարդ Շարմազանովը։

Դիտարկմանը, որ Հայաստանի հատուկ ծառայության ղեկավարը երկու տարի շարունակ իմացել է, որ Հայաստանի ղեկավարին գործարք է առաջարկվում Արցախի տարածքների հետ կապված և այդ մասին բարձրաձայնում է հիմա, Էդուարդ Շարմազանովը նշեց, որ դա իր համար երկրորդական հարց է․ «Այսօր թիվ մեկ խնդիրը հողատու Նիկոլի հեռացումն է։ Մնացած բոլոր հարցերով կարող եք պարոն Վանեցյանին դիմել, եթե հարկ համարի, կպատասխանի այդ հարցերին։ Այսօր մեր ժողովուրդը ոտքի է կանգնել օր առաջ ազատվելու դավաճանից։ Չի ուզու՞մ հրաժարական տալ, կպարտադրենք։ Ինքն իր «կիրթ, կառուցողական» Ալիևի հետ բերել է պատերազմ, այսօր էլ բոլորին պատասխանում է բացի Ալիևից։ Ինքն է թուրքերին բերել Կովկաս, ինքն է թուրքերին բերել Հայաստան ու Արցախ»,-նշեց Էդուարդ Շարմազանովը։

Աղբյուր` Փաստինֆո