Փաստ ինֆո

Հադրութում մինչև պատերազմը բնակվել է ավելի քան 13 հազար բնակիչ, նրանք զրկվել են մշտական բնակության վայրից և մինչ օրս լուծված չէ մշտական բնակության հարցը։

Ադրբեջանի վերահսկողության տակ անցած Հադրութի բնակիչների հաշվառումը գրեթե ավարտված է։ Ըստ գյուղերի և բնակավայրերի՝ ընտանիքի կազմի մասին տեղեկությունները լրացված են։ Նրանք զրկվել են անշարժ ու շարժական գույքից, ոմանք անգամ պատերազմի օրերին բնակավայրերում են թողել անձնագրերը։

«Հաշվարկները կարելի է ասել արված են 90 տոկոսով, այս պահին ճշտումներ ենք անում, որպեսզի ներկայացնենք սոցապ նախարարություն՝ ֆինանսական աջակցության տրամադրումը սկսելու համար»։ Այս մասին «Փաստինֆո»-ի հետ զրույցում ասաց Հադրութի քաղաքապետ Վահան Սավադյանը։

«Կոնկրետ Հադրութ համայնքի Հադրութ քաղաքում և Վանք գյուղում 4250 հոգու մասին է խոսքը, իսկ ամբողջ շրջանում մոտ 14.000 բնակիչ մնացել է անօթևան»։
Թե որտե՞ղ են ապրելու հադրութցիները, դեռ պարզ չէ, բնակիչների հետագա բնակության հարցերը լուծված չեն։ ԱՀ աշխատանքի և սոցիալական հարցերի նախարարությունում նախատեսված է միանվագ 300.000 դրամ ֆինանսական օգնություն տրամադրել բնակիչներին՝ յուրաքանչյուր ընտանիքի յուրաքանչյուր անդամի համար։

«Տան մասով դեռ հստակ ոչինչ չկա։ Գումարը տրամադրում են, որպեսզի մարդիկ վարձով բնակարան գտնեն, ձմեռն անցկացնեն, մինչև մի լույս բացվի»,- ասաց Սավադյանը։
Շարունակվում է հաշվառումը՝ հստակեցնելու, թե քանի՞ բնակիչ է վերադարձել Արցախ. Ըստ Հադրութի քաղաքապետի, 14.000 բնակչից 2 100-ն է վերադարձել Արցախ, նրանք ապրելու են վարձով։

«Մոտավոր կարող եմ ասել, որ այս պահին վերադարձել է մոտ բնակիչների 15 տոկոսը։ Մարդիկ ցանկություն ունեն վերադառնալու, բայց կացարանային խնդիրը թույլ չի տալիս, որ նրանք վերադառնան Արցախ»,- ասաց Սավադյանը։

Հադրութի քաղաքապետ Վահան Սավադյանը նոյեմբերի 11-ին «Փաստինֆո»-ի հետ զրույցում նշել էր, որ Հադրութի շրջանի երկու գյուղ՝ Խանձաձորը և Հին թաղերը մնացել են Արցախի բանակի հսկողության ներքո։ Նա ասել էր, որ բնակիչներն անգամ նշված գյուղեր դժվար թե մոտ ժամանակներս վերադառնան։

Աղբյուր` Փաստինֆո