Փաստ ինֆո

«Եռակողմ պայմանագիրը հնարավորություն տվեց, որ այստեղ մտնեն ռուսական խաղաղապահ զորքերը, հիմա իրենք են մեր ՝ Հայաստանի անվտանգության երաշխիքը»,- այս մասին ասաց  ընդդիմության ՀՀ վարչապետի միասնական թեկնածու Վազգեն Մանուկյանը՝ մտավորականների ու մշակույթի գործիչների հետ հանդիպման ժամանակ։

Մանուկյանը նշեց, որ եթե մինչև դա անվտանգության երաշխիքը մեր բանակն էր ու դաշնակիցների հետ համաձայնագրերը, հիմա հիմնական անվտանգության երաշխավորը ռուս խաղաղապահներն են։

«Չեմ հասկանում, երբ որ՝ ռուսական բազան հանելու պահանջով ցույցեր են լինում Երևանում կամ Արցախում։ Հասարակության մեջ կարող են լինել պատմական վեճեր, բայց եթե մեկը դուրս է գալիս փողոց՝ պայքարելու ռուսական բազաների դեմ ՝ դա հակառուսկաան տրամադրություն չէ, փող է, որ տրվում է արտաքին ուժերի կողմից, որպեսզի ինքը պայքարի՝ այստեղ Ռուսաստանի ազդեցությունը նվազեցնելու համար։ Իսկ դա ամենաշատը պետք է Թուրքիային»։

Վազգեն Մանուկյանը հավելեց, որ իրավունք ունի ենթադրելու, որ այդ մարդիկ Թուրքիայի գործակալներն են, որոնք կատարում են նրանց առաջադրանքը։ Հիմա պետք է լրջորեն քննարկել՝ ինչ հարաբերություններ պետք է ունենանք Թուրքիայի, Իրանի ու մյուս երկրների հետ։

«Պատերազմը չավարտված, երբ լարված է Արցախում և ՀՀ-ի սահմաններում, մարդիկ, որ հայտարարում են, թե Թուրքիայի հետ հարաբերություններ պետք է ստեղծենք ՝ դա անհասկանալի է։ Այդ մարդը երևի մանկապարտեզ էլ չի գնացել։ Մանկապարտեզից բոլորը գիտեն, որ եթե կռվի ժամանակ գնում, ասում ես՝ եկեք հաշտվենք, ուրեմն դա կլինի մեր երկրորդ կապիտուլյացիան»։

Վարչապետի միասնական թեկնածուն հիշեցրեց, որ պետք է հետագայում տարբեր հարաբերություններ ձևավորվեն նաև այլ երկրների հետ, բայց այս պահին անվտանգության երաշխիքը Ռուսաստանն է։

«Այս պահին դա ասել՝ նշանակում է երկրորդ կապիտուլյացիա, դա իրենց թելադրվո՞ւմ է, թե դա իրենց տգիտությո՞ւնն է, դա ինձ չի հետաքրքրում»,- եզրափակեց Մանուկյանը։

Աղբյուր` Փաստինֆո