Փաստ ինֆո

«Վարչապետի պաշտոնը զբաղեցնող անձը որևէ կերպ չի տեսնում այս անվերջ քանակությամբ մարդկանց, չի ուզում տեսնել, որ իրենք ուզում են, որ վարչապետը գնա»,- այս մասին լրագրողների հետ զրույցում ասաց ԱԺ նախկին փոխնախագահ Արփինե Հովհաննսիայնը արժանապատվության երթի ժամանակ, հավելելով, որ  հրաժարականն են ուզում ոչ թե որովհետև իրեն չեն սիրում, այլ որովհետև ինքը դավաճանել է հայրենիքը, բոլորի մեջքի հետևում կնքել է գաղտնի կապիտուլյացիոն պայմանագիր և այդ գործելաոճը շարունակվում է։

«Քիչ առաջ տեղեկություն ստացանք, որ պատերազմական հանցագործներ, ադրբեջանցի երկու դիվերսանտները հանձնվել են Ադրբեջանին, այսինքն ինքը ռազմագերուն ռազմագերու հետ չի փոխանակում, ինքը պատերազմական հանցագործին է փոխանակում, տվեց Ադրբեջանին՝ կրկին գաղտնի։ Նա իրականում ոչինչ չի անում ՀՀ շահերը արժանապատիվ կերպով պաշտպանելու համար։ Այս մարդու գործելաոճը բացառապես սուտ է, կեղծ է, մանիպուլյացիա է, նա չի տեսնում այս ժողովրդին, որ պահանջում է իր հրաժարականը»,- ասաց Հովհաննիսյանը։

ԱԺ նախկին փոխնախագահը կրկին կոչ արեց, որ Նիկոլ Փաշինյանը հեռանա և թույլ տա, կազմակերպվեն արտահերթ ընտրություններ։
«Նա առաջին հերթին ինքնասիրություն պիտի ունենար, եթե ինքը տրորել է մեր արժանապատվությունը թուրքի առաջ, խոնարհվել է թուրքի առաջ, դա չի նշանակում, որ պետք է մեզ էլ ստիպի դա անենք, իսկ ինքը ամեն օր իր «գործելաոճով» դա է մեզ ստիպում անել։ Ստիպում է, որ մենք մոռանանք զոհերին, մեր անհետ կորածներին»։

Արփինե Հովհաննիսյանը կրկնեց, որ Նիկոլ Փաշինյանը ստախոս է, որովհետև խոսելով Զանգելանի և Կուբաթլուի հատվածի սահմաննազատման մասին, նա իրականում վտանգել է Գորիս-Կապան հատվածը։

«Շատ վտանգավոր միջանցքի մասին է խոսքը՝ Անգեղակոթ-Սիսիան-Գորիս-Տեղ հատվածում, այս մասին խոսում են կուլիսներում։ ՀՀ սահմանները, Սյունիքի մարզը վտանգված է, Փաշինյանն ուզում է համակերպվենք։ Բանակ չհանելով, Նիկոլ Փաշինյանը սառնասրտորեն հայ զինվորներին թողել է թշնամու կողմում՝ մահանալու»,-ասաց Արփինե Հովհաննիսյանը։

Աղբյուր` Փաստինֆո