Փաստ ինֆո

«Հայտնի չեն այն իրավական հիմքերը, որոնց հղում տալով, կարող ենք ասել, թե ինչո՞ւ կամ ինչպե՞ս այսօր Բաքվին հանձնվեցին երկու մարդասպանները: Ընդ որում, սա մի այնպիսի արտառոց գաղտնիության պայմաններում արվեց, որը մեզ լիարժեք կերպով թույլ է տալիս պնդելու, որ Նիկոլ Փաշինյանն այսօր կյանքի կոչեց Ալիևի հետ ունեցած հերթական գաղտնի և հանցավոր գործարքը,- «Փաստինֆո»-ի հետ զրույցում ասել է Հայաստանի Մարդու իրավունքների առաջին պաշտպան Լարիսա Ալավերդյանը՝ անդրադառնալով 2014 թվականի հունիսին Արցախում սպանության համար դատապարտված ադրբեջանցի դիվերսանտներ Դիլհամ Ասկերովի և Շահբազ Գուլիևի Բաքվին հանձնելու Երեւանի որոշմանը։

«Ակնհայտ կերպով սա նվաստացուցիչ կապիտուլյացիայի շրջանակներում իրականացված հերթական գործարքն է, իսկ գաղտնիության հանգամանքը մեզ հիմքեր է տալիս ենթադրելու, որ բացի արդեն հայտնի փաստաթղթից, Նիկոլ Փաշինյանը հանձն է առել կատարելու նաև այլ պարտավորություններ կամ ադրբեջանական կողմի քմահաճույքներ, որոնք, առանց կասկածի, կործանման են տանում արդեն նաև Հայաստանի Հանրապետությունը»,- նշել է նա:

Ի՞նչ գործ ունի Հայաստանը Արցախում, որի սահմաններն ինքն այլևս պատրաստ չէ պաշտպանելու, հարց է ուղղում Լարիսա Ալավերդյանն ու հավելում, չէ՞ որ արդեն հայտնի է՝ Հայաստանի բանակը պետք է պաշտպանի միայն Հայաստանի Հանրապետության պետական սահմանները. «Այս պահի դրությամբ Հայաստանը պատերազմող երկիր չէ, այս իշխանությունը որևէ կերպ մասնակցություն չի ունեցել նաև վերոհիշյալ դիվերսանտների դատավարման պրոցեսին, մինչև անգամ մեզ համար անհայտ է, թե ի՞նչ գրավոր փաստաթղթով է Արցախի նախագահը լիազորել դրանց արտահանձնումը: Մյուս կողմից փաստենք, որ Արցախի նախագահը հանցագործ դիվերսանտներին պաշտոնապես համաներում չի շնորհել: Այստեղ այնքան անպատասխան հարցեր կան, որոնք հիմք են տալիս պնդելու՝ մարդասպան դիվերսանտներին արտահանձնելու պրոցեսը տեղի է ունեցել բացառապես անօրինական հիմքերի վրա: Հավանաբար, Նիկոլ Փաշինյանը բավարարել է Ալիևի հերթական քմահաճույքը, հակառակ դեպքում, մենք պետք է հարցն այսպես ձևակերպենք՝ արդյո՞ք Հայաստանն առևանգել է Արցախում պահվող մարդասպան դիվերսանտներին և նրանց արտահանձնել Բաքվին»,- նկատում է Լարիսա Ալավերդյանը:

Հայաստանի մարդու իրավունքների առաջին պաշտպանը հարկ է համարում հատուկ կերպով ընդգծել՝ չմոռանանք, որ հայի սպանության մեջ մեղադրվող դիվերսանտները Բաքվում հերոսներ են համարվում, նրանց հերոսացման պրոցեսն Ադրբեջանում սկսվել է հանցանք գործելու պահից անմիջապես հետո, երբ արդեն հայտնի է դարձել այդ մասին. «Հետևաբար, ես գտնում եմ, որ սա ևս մեկ քաղաքական հանցագործություն է և, հատկապես այս ենթատեքստում, նրանց արտահանձնելու թաքուն գործընթացն ամբողջովին դատապարտելի է»:

Անդրադառնալով շրջանառության մեջ մտած այն լուրերին, թե մարդասպան դիվերսանտներին Բաքու են արտահանձնել Նիկոլ Փաշինյանի անմիջական հրահանգով, Լարիս Ալավերդյանը նկատում է. «Ես դեռ մի կերպ կարող եմ հասկանալ այդ մարդու հրահանգը՝ տված իր կնոջը՝ գնալ և մտնել Արցախի գեներալիտետի բունկեր, բայց ոչ մի կերպ չեմ հասկանում, թե նա ի՞նչ իրավասությամբ է հրահանգում Արցախին՝ բաց թողնել առանձնապես դաժան սպանությունների համար դատապարտված դիվերսանտներին:

Թող ինձ ցույց տան այդ օրենքը, նորմը, որով նա առաջնորդվել է այդ քայլն անելիս, իսկ եթե նման նորմ կամ օրենք չկա, ապա ակնհայտ է, որ սա նրա հերթական անօրինական գործարքն է Ալիևի հետ, որում նա ներքաշել է նաև Արցախի պատկան մարմիններին»,- եզրափակում է զրույցը Լարիս Ալավերդյանը:

Տեղեկացնենք, որ այսօր ադրբեջանական թելեգրամ-ալիքները Բաքվի օդանավակայանից լուսանկարներ են հրապարակել, համաձայն որի՝ Արցախում սպանության համար դատապարտված ադրբեջանցի դիվերսանտներ Դիլհամ Ասկերովը և Շահբազ Գուլիևը փոխանցվել են Բաքվին։ Կեսօրին լուրեր տարածվեցին այն մասին, որ ազգային պատկանելության հիմքով առանձնապես ծանր հանցագործություններ կատարած դիվերսանտների արտահանձնումը ադրբեջանական կողմին տեղի է ունեցել Փաշինյան Նիկոլի անմիջական հրահանգով:

Հիշեցնենք, որ Դիլհամ Ասկերովն ու Շահբազ Գուլիևը կազմակերպված հանցավոր խմբով 2014 թվականի հունիսին անօրինական կերպով հատել էին ԼՂՀ պետական սահմանը, առևանգել և առանձնակի դաժանությամբ սպանել անչափահաս Սմբատ Մեխակի Ցականյանին, ինչպես նաև նույն հանցավոր խմբով կյանքիզ զրկել էին Երևան քաղաքի Ա. Սարգսյան փողոցի թիվ 6 շենքի բնակիչ, 1971թ. ծնված Սարգիս Սամվելի Աբրահամյանին, իսկ ՀՀ Կոտայքի մարզի Ձորաղբյուր գյուղի բնակչուհի, 1977թ. ծնված Կարինե Արշավիրի Դավթյանին պատճառել հրազենային վնասվածքներ։

Հեղինակ՝ Նվարդ Մանվելյան

Աղբյուր` Փաստինֆո