Փաստ ինֆո

Մենք մոտեցել ենք գերիների փոխանակման, մեր գերիների վերադարձի գործընթացի մեկնարկին։ Այս մասին ֆեյսբուքյան ուղիղ եթերի ժամանակ ասաց ՀՀ վարչապետ Նիկոլ Փաշինյանը։

Վարչապետը նշեց, որ շուտով սպասում են մեր գերիների պաշտոնապես հաստատված խմբի վերադարձի մեկնարկին․ «Մեր մտածմունքը հետևյալն է՝ այս փուլում պետք է սկսենք վերադարձնել այն գերիներին, որոնց գերեվարված լինելու փաստը հաստատված է պաշտնապես Ադրբեջանի և Կարմիր խաչի կողմից, որից հետո ավելի շատ կենտրոնանանք անհայտ կորածների փնտրտուքի վրա, որոնց մի մասը հնարավոր է գերեվարված լինեն»,-ասաց վարչապետը՝ նկատելով, որ դա նույնպես շատ բարդ գործընթաց է և ակնկալում է քաղաքացիների, անհայտ կորածների ընտանիքների ըմբռնումը։

Նիկոլ Փաշինյանը նշեց, որ նոր թափով պետք է տեղի ունենա նաև զոհվածների մարմինների փնտրտուքը և չճանաչված մարմինների ճանաչման գործընթացը։ Վարչապետը վստահեցրեց, որ ամեն ինչ արվում է՝ օր առաջ այս գործընթացն ավարտելու համար․ «Ցավոք մինչև տարեվերջ չենք կարողանա լրիվ ավարտել։ Անհայտ կորածների որոնողական աշխատանքների համար շատ կարևոր է միջավայրի բարելավումը, որովհետև այդ պրոցեսի արդյունավետությունը միայն մեզնից չի կախված, և մենք քայլեր ենք ձեռնարկում, որ միջավայրը բարելավվի և այս հարցերում կարողանանք աշխատել ավելի արդյունավետ»,-ասաց վարչապետը։

Աղբյուր` Փաստինֆո