Փաստ ինֆո

ՀՀ պաշտպանության նախարարությունը պետք է ստեղծի հանձնաժողով՝ վերլուծելու մեր պարտության պատճառները»,- «Արմնյուզ» ՀԸ «ՕրաԽնդիր» հաղորդման ժամանակ հայտարարել է ՀՀ պաշտպանության նախկին նախարար, գեներալ-գնդապետ, Արցախի հերոս Սեյրան Օհանյանն ու ընդգծել՝ «պարտությունը և՛ քաղաքական ու դիվանագիտական է, և՛ ռազմական՝ օպերատիվ-մարտավարական օղակում»։

Գեներալ-գնդապետն ընդգծել է, որ պետք է փակել բոլոր նրանց բերանը, ովքեր ասում են, թե միայն բանակն է պարտվել։ «Պարտվել է ոչ թե բանակը, այլ պետությունը, բանակն անձնվիրաբար կռվել է, հերոսությունների դրվագներ են ցուցաբերել։ Մեր բանակը եղել է մրցունակ, սպառազինություն է ունեցել։ Դիվանագիտական թերի աշխատանքը պետական կառավարման համակարգի բացթողումներից է»,- նշել է նախկին նախարարը:

Սեյրան Օհանյանի դիտարկմամբ՝ բանակցային գործընթացում Հայաստանը մեկուսացել էր, ինչից էլ Ադրբեջանի ու Թուրքիայի ղեկավարությունն օգտվեց ու պատերազմ սկսեց։

«Մենք կարող էինք կա՛մ կանգնեցնել պատերազմը ինչ-որ բնագծերում, կա՛մ այսքան զոհերով հաղթանակ ունենալ։ Գոնե լեռնաանտառային հատվածներում մենք ունեինք այդ հնարավորությունը։ Պարտության պատճառներից մեկը կարգապահության ցածր մակարդակն էր հատկապես զորահավաքային ռեսուրսում»,- հայտարարել է Սեյրան Օհանյանը:

ՀՀ պաշտպանության նախկին նախարարի գնահատմամբ՝ պարտության հիմնական պատճառն իշխանության անգրագիտությունն ու անփութությունն էր, պաշտպանության ոլորտում արված անհամափաչափ փոփոխությունները:

«Ալիևը հոխորտում է, ծաղրում է Նիկոլ Փաշինյանին, նա չի պատասխանում։ Եթե նա պատասխանի, Ալիևը կասի՝ այսքանից հետո դու դեռ խոսո՞ւմ ես։ Մեզ պե՞տք է պարտված ղեկավար, որը չի կարող բանակցություններ վարել։

Ստեղծվելիք անցումային կառավարությունը պետք է ուշադրություն դարձնի անվտանգության, պաշտպանության ոլորտին՝ արագ լուծելու ՀՀ սահմանային խնդիրները, սահմանապահ բնակիչը չպետք է միայնակ մնա»,- ասել է Սեյրան Օհանյանը։

Աղբյուր` Փաստինֆո