Փաստ ինֆո

Մեր օրակարգում միայն Փաշինյանի հրաժարականի հարցն է, որ պարտված ղեկավարը հեռանա,այլ հարցեր իմաստ չկա քննարկել,- «Փաստինֆո»-ի հետ զրույցում ասել է ՀՀ ԱԺ «ԲՀԿ» խմբակցության պատգամավոր Միքայել Մելքումյանը:

Նրա խոսքով՝ մենք արդեն մեծ ռիսկի ենք գնացել՝ տալով Հայաստանի տարածքի 1/3- ից ավելին,որի հիմնական մասը տվել ենք առանց պատերազմի,հիմա որևէ երաշխիք չկա, որ հետագայում մենք Սյունիքի հետ կապված խնդիրներ չենք ունենա.

«Կուտակումներ կան Նախիջևանում, իսկ համատեղ մոնիտորինգի կենտրոնը,որը Թուրքիան նախատեսում է տեղաբաշխել Բարդա-Միրբաշիր հատվածում՝ Մարտակերտի հյուսիսարևելյան շրջանում է և կրկին լրացուցիչ ռիսկեր է առաջացնում»,-ասաց Մելքումյանը:

Պատգամավորն արձանագրում է՝պետական կառավարման համակարգը անկառավարելի և կիսալուծարված վիճակում է, պետական ապարատը չի աշխատում և դրանից բխում են լրջագույն խնդիրներ.

«Կան փոխարժեքի հետ կապված խնդիրներ, թանկացումներ, արդյո՞ք դա կկանգնի, լրջագույն ռիսկեր կան բանկային համակարգի հետ կապված, մեր պահուստներն ինչպե՞ս կօգտագործվեն և ի՞նչ վիճակում կհայտնվեն կարճ ժամանակ հետո, եթե քաղաքական կայուն վիճակ չկա, կան բացասական սպասումներ , բիզնեսը որևէ բան չի ծրագրի, ներդրումներ չեն լինի»,-ասաց պատգամավորը՝ հավելելով, որ ներդրումներ չկային նաև պատերազմից առաջ, երկրից ներդրումները հոսում էին, և այդ ամենը կառուցվում էր ստի և կեղծիքի վրա:

Պատգամավորը չբացառեց, որ հիմա էլ ինչ կատարվում է,իշխանությունը խորությամբ չի ներկայացնում.

«Տնտեսական անկումը սկզբում նախատեսված էր -2% ապրիլին, հիմա արդեն -7% է, բայց կարծում ենք կհասնի մինչև -10 %-ի:Կան փախստականներ և տներից զրկված քաղաքացիներ, որոնք եկել են Արցախի տարբեր շրջաններից,սահմանամերձ գյուղերից էլ մարդիկ դուրս են գալիս, որովհետև անվտանգ չէ, արոտավայրեր և ցանքատարածություններ են կորցրել:Անվերջանալի շարք է, թե ինչ ռիսկեր կառաջանան:Այսօր նայում են ԵԱՏՄ նիստում վարչապետի ելույթը, այս խնդիրների հետ կապված որևէ հարցադրում չտեսա, թե ԵԱՏՄ ինտեգրման շրջանակներում ի՞նչ աջակցություն է պետք Հայաստանին»,-ասաց ԲՀԿ պատգամավորը:

Մելքումյանը նշեց, որ վարչապետի հեռանալու դեպքում պետք է Ռուսաստանի հետ արժանապատիվ բանակցություններ վարել՝ արդեն ոչ պարտվողի դիրքերից և պետք է փորձել առկա բոլոր ռիսկերը մեղմել:

«Փաստինֆո»-ի դիտարկմանը՝ստեղծված իրավիճակում և ֆինանսական ռեսուրսների սղության պայմաններում՝ի՞նչպես են արտահերթ ընտրություններ անցկացնելու, պատգամավորը նշեց.«Մենք չենք ասում՝ այս պահին ընտրություն կազմակերպենք, այն կազմակերպենք մեկ տարի հետո, երբ վարչապետը հրաժարական տա, ձևավորվի ժամանակավոր կառավարություն, և երբ վիճակը կայունանա, այդ ժամանակ էլ կանենք ընտրություններ»,-ասաց Մելքումյանը:

Այն հարցին, թե իշխանությունները ինչու՞ ականջալուր չեն լինում ընդդիմության ներկայացուցիչների և փորձագետների ահազանգերին, որ այս անգամ էլ վտանգված է Զանգեզուրը, պատգամավորը նշեց, որ սա ևս փաստում է, որ իշխանությունը չի տիրապետում իրավիճակին և պետք է հեռանա:

Աղբյուր` Փաստինֆո