Փաստ ինֆո

Վարչապետը որոշել էր, որ փորձառու գեներալներն իրավունք չունեն հրամանատարական կետ այցելելու, Արայիկ Հարությունյանն ինձ անձամբ արգելեց գնալ այնտեղ,- «Արմնյուզ» ՀԸ «ՕրաԽնդիր» հաղորդման ժամանակ հայտարարել է ՀՀ պաշտպանության նախկին նախարար, գեներալ-գնդապետ, Արցախի հերոս Սեյրան Օհանյանը:

«Ես և գեներալ Խաչատուրովը պատերազմի առաջին օրը գնացել ենք ՊՆ, երկու օր շարունակ մեզ չընդունեցին։ Ես որոշեցի ինքնակամ մեկնել Արցախ՝ աջակցելու ՊԲ-ին, ներկայացա Արայիկ Հարությունյանին, ապա մեկնեցի հրամանատարական կետ։ Սեպտեմբերի 30-ին ես արդեն պնդում էի, որ ՀՀ և Արցախի իշխանությունները պետք է ամեն ինչ անեն՝ վերականգնեն բանակցային գործընթացը։

Վարչապետը որոշել էր, որ փորձառու գեներալներն իրավունք չունեն հրամանատարական կետ այցելելու, Արայիկ Հարությունյանն ինձ անձամբ արգելեց գնալ այնտեղ»,- եթերում պատմել է Սեյրան Օհանյանը։

Ըստ նախկին նախարարի՝ իրեն արգելվել է մասնակցել ռազմական գործողությունների ծրագրմանը, փոխարենն առաջարկել են զորահավաքային, աշխարհազորային ռեսուրսի հարցերը հոգալ։

«Ես իմ նախաձեռնությամբ աջակցություն եմ ցուցաբերել Շուշիի աշխարհազորի ձևավորմանը»,- նշել է Արցախի հերոսն ու ավելացրել, որ նոյեմբերի 5-ին երեք կողմից շրջափակման մեջ են եղել, գործել է՝ ըստ իրավիճակի, իսկ բանակի հրամանատարությունն իր հետ կապ հաստատելու փորձ չի արել։

Դառնալով այդ օրերին որոշ շրջանակների կողմից սոցիալական ցանցերում շրջանառության մեջ դրված այն լուրերը, թե, իբր, կռվի ժամանակ փախուստի է դիմել՝ Ս.Օհանյանը նշել է.«Իմ ֆիզիկական վիճակից ելնելով՝ չէի կարող փախչել, թող չշահարկեն։ Նոյեմբերի 6-ի առավոտյան մենք լքել ենք քաղաքը, քանի որ բանակի ղեկավարությունը որոշել էր տեղափոխել հրամանատարական կետը»:

Աղբյուր` Փաստինֆո