Փաստ ինֆո

Միասնականության երթի մասնակիցները Կառավարության դիմացից կրկին շարժվեցին Ֆրանսիայի հրապարակ, որտեղ որ սկսել էին այսօրվա քայլերթը։ ֆրանսիայի հրապարակում, սակայն, ոստիկանության ծառայողները պաշտպանական պատ էին կազմել։ 

«Հայրենիք» կուսակցության ղեկավար Արթուր Վանեցյանը կանգնեց մեքենայի վրա և բարձրախոսով գոչեց՝ «Նիկոլ, դավաճան», իսկ քաղաքացիները կրկնում էին կոչը։

«Այսօր ՀՀ հազարավոր քաղաքացիներ իրականացնում էին անհնազանդության ակցիաներ։ Դավաճան Նիկոլի հրամանով մեր ընկերներից շատերի՝ մի քանի հարյուրների բերման են ենթարկել, տարել ոստիկանության բաժիններ։ Այսպիսով՝ Նիկոլ Փաշինյանը փորձում է մասնատել մեր պայքարը, բայց արդյոք կստացվի՞ նրա մոտ կասեցնել մեր պայքարը։ Մենք անպայման հաղթելու ենք։ Այս պահին ոստիկանության բաժնում է Իշխան Սաղաթելյանը, Գեղամ Մանուկյանն ու մեր մյուս ընկերները»։

Հավաքվածները ողջունեցին բերման ենթարկվածներին և սկսեցին վանկարկել՝ «ազատում»։

Վանեցյանը տեղեկացրեց՝ երթը ինքաբուխ է, ուներ երկու խորհուրդ. «Միացում հանուն հայրենիքի և անպայման հաղթելու ենք»,- ասաց Վանեցյանը, հավելելով, որ ամենօրյա ռեժիմով իրականացնելու են քայլերթ, որով և կարճ ժամանակում հասնելու են իրենց նպատակին՝ վարչապետի հրաժարականին։ Շնորհակալություն հայտնեց հավաքվածներին և ոստիկաններին։

«Ճիշտ է  կեսից, բայց սկսեցին ապահովել անվտանգությունը, լսել ժողովրդի ձայնը։ Տղերք, ես ձեզանից մեկն եմ, ինձ համար անսովոր է այս վիճակը, բայց պետք է հասկանանք, որ Հայաստանի փրկության և մեր ժողովրդի ու երեխաների համար պետք է ցանկացած պահի պայքարենք դավաճան իշխանությունների դեմ»։

Քաղաքացիները ծափահարություններով շնորհակալություն հայտնեցին նաև ոստիկաններին, իսկ Արթուր Վանեցյանը հայտարարեց օրվա երթի ավարտի մասին, հավելելով՝ որ վաղն ամեն ինչ կսկվի նորից։ 

Աղբյուր` Փաստինֆո