Փաստ ինֆո

Քանի դեռ Հայաստանի կառավարությունը համայնքների հույսին է թողել սահմանամերձ գյուղերի բնակիչներին՝ իրենց խնդիրներով հանդերձ, Ադրբեջանը շարունակում է երկու պետությունների սահմանը զատել իր ցանկությամբ և ուժի զոռով։ Հարցը, թե՝ ինչի՞ հիման վրա է Հայաստան-Ադրբեջան սահման գծվում Սյունիքի մարզում, այսօր գերհրատապ է։ Բայց այդ հրատապությունը որքանո՞վ է գիտակցում ներկա իշխանությունը, եթե օրենսդիրների առջև գործադիրի ղեկավար կազմը, մասնավորաբար, Փաշինյանը և Ավինյանը հայտարարում են, թե սահմանազատման համատեքստում որևէ փաստաթուղթ գոյություն չունի։ Ի՞նչ է սա, եթե ոչ հաղորդում հանցագործության մասին։ Այսինքն, ստացվում է, որ ՀՀ ամբողջականությունը խախտվում է, քանզի առանց որևէ իրավական փաստաթղթի սահման է գծվում միմյանց հանդեպ թշնամաբար տրամադրված պետությունների միջև։

Ավելին` Նիկոլ Փաշինյանը չհերքեց ԱԺ «ԼՀԿ» խմբակցության պատգամավոր Տարոն Սիմոնյանի դիտարկումը, որ Նիկոլ Փաշինյանի նոյեմբերի 10-ին ստորագրած փաստաթութը չի անցել վավերացման ընթացակարգ Հայաստանում, այն ուժի մեջ չի մտել, բայց Փաշինյանն այն իրագործում է:

«Ստորագրել եք մի փաստաթուղթ, որը մի քանի դրվագով խախտում է միջազգային իրավունքը, ոտնահարված է հայկական շահը, փաստաթուղթը ուժի մեջ չի մտել սահմանված կարգով, բայց շարունակվում է իրագործվել։ Ի՞նչ իրավական հիմքով եք դուք շարունակում կիրառել այս փաստաթուղթը, եթե դա ուժի մեջ չի մտել», - հայտարարել էր Տարոն Սիմոնյանը, ինչին վարչապետը չպատասխանեց, չհերքեց, որ խախտել է. ՀՀ Սահմանադրությունը:

Առնվազ երկու դեպքում Փաշինյանի հայտարարությունները պարունակում էին հանցագործության հատկանիշներ` Սահմանադրությունը խախտելու, ՀՀ տարածքային ամբողջականությունը վտանգելու վերաբերյալ, որոց ուղղությամբ քայլերը կատարվում են Փաշինյանի բանավոր հանձնարարությամբ:

ՀՀ օրվա իշխանությունը թույլ է տալիս, որ ազերիները թիզ առ թիզ առաջ տան իրենց սահմանը, այսինքն, գործնական քայլերի դիմեն, իսկ տեսականը, փաստաթղթայինը, փաստորեն, կհաջորդի սրան։

Տպավորությունն այնպիսին է, որ ինքնակամ հողազավթումների օրինակով իմքայլական իշխանությունը սրանց ազատություն է տվել, թե՝ դուք մտեք, վերցրեք, մենք հետո օրինական դաշտ կտեղափոխենք հարցը։ Արդյո՞ք սա չէ պատճառը, որ ադրբեջանցիները մեր գյուղացիների դիմադրությունը կոտրելով, առաջ են գալիս։
Այս՝ ենթադրյալ հանցավոր համաձայնությունը երեկ փաստվեց նաև Ազգային Ժողովում, երբ ի պատասխան ԼՀԿ-ական պատգամավորի հարցապնդման, թե՝ Սյունիքի որոշակի հատվածներում GPS-ը ցույց է տալիս Ադրբեջան, հնարավո՞ր է, որ GPS-ով դեմարկացիայի ժամանակ ադրբեջանցիները հասնեն մինչև մայրուղի և ստիպված լինենք, ասենք, սիսիանցիներով գնալ ու պարզաբանում տալ, որ դա մեր տարածքն է՝ ՀՀ փոխվարչապետ Տիգրան Ավինյանը նշեց, թե՝ «ՀՀ-ի և Ադրբեջանի միջև սահմանազատման իրավական փաստաթուղթ ընդունված չէ և այդ գործընթացում կարևոր են բանակցությունները, որոնք կարճ ժամկետում կլինեն և արդյունքում կիրականացվի սահմանազատում և տեղի է կունենա դեմարկացիա»։ Ըստ նրա, «այդ պայմանավորվածությունների և փաստաթղթերի համաձայն էլ, որ կընդունվեն մեր և Ադրբեջանի ԱԺ-ների կողմից, կհստակեցվի իրավական սահմանը երկու երկրների միջև»։

Նկատենք, որ այս խնդիրն առկա է արդեն Սյունիքի սահմանային բոլոր ուղղություններում, մասնավորաբար, Սյունիքի մարզի Տեղ, Արավուս գյուղերում ադրբեջանցիներն օգտվելով ՀՀ իշխանությունների անգործությունից, զգալի առաջ են եկել՝ խախտելով Հայաստանի սահմանը, ընդ որում՝ տեղ-տեղ մտնելով սեփականաշնորհված տարածքներ։

Ի դեպ, ԱԺ-ում հարցուպատասխանի օրը Ավինյանը հստակ չպատասխանեց նաև այն հարցին, թե՝ բանակցությունների հիմքում ի՞նչն է դրվելու՝ GPS-ը, 1990-ականների Հայաստանի սահմանները, թե՞ ՀՀ-ում սահմանների մասին օրենքը։ Ըստ նրա՝ «դեմարկացիայի գործընթացը բավականին բարդ է և երկրներ կան, նաև մենք՝ մեր հարևան երկրների հետ, Ադրբեջանն իր որոշ հարևան երկրների հետ, մինչ այսօր վերջնական այդ գործընթացը չեն իրականացրել»։

Ցավոք, սա այդ դեպքը չէ, քանի որ գործ ունենք մեր հայրենիքը մեզնից խլած թշնամական հարևանի հետ։

Թե ինչ կլինի հետո, հստակ չէ, իսկ այն, ինչ այսօր է տեղի ունենում մեր սահմանային մարզերում՝ Ադրբեջանի կողմից, ակնհայտորեն՝ օրենքից դուրս է, որևէ փաստաթղթային հիմք չունի։ Այսինքն, հանցագործություն է տեղի ունենում, ինչի մասին երեկ, Ազգային Ժողովում հաղորդում տվեցին ՀՀ վարչապետ Փաշինյանն ու ՀՀ փոխվարչապետ Ավինյանը։

Մնում է այս մասին հասկանա նաև ՀՀ գլխավոր դատախազությունը և ընթացք տա։

Աղբյուր` Փաստինֆո