Փաստ ինֆո

Ներկայիս վարչապետի 2.5 տարվա գործունեությունը կարելի է մեկ բառով անվանել՝ տապալված: Նա տապալել էր մեր սոցիալ-տնտեսական բնականոն գործունեությունը կազմակերպելու խնդիրը՝ մինչ համավարակը, նա տապալեց համավարակը և խայտառակ ձևով ժողովրդին կանգեցրեց փաստի առջև՝ պատերազմի արդյունքներով: «Փաստինֆո»-ի հետ զրույցում ասաց ՀՀ նախկին վարչապետ Խոսրով Հարությունյանը՝ արձանագրելով, որ այսօր ՀՀ-ում կառավարությունը, ըստ էության չի գործում, պարալիզացված է։

«ֆորմալ պատերազմում պարտվել ենք, , ռազմական գործողություններն ավարտել են, սակայն շարունակում ենք պարտվել, ինչը խոսում է այն մասին, որ չկա պետություն, այն կազմալուծված է, այլապես մեր գյուղապետերը իրենց ջոկատներով չէին փորձի դիմագրավել ադրբեջանական զինուժին՝ համայնքի սահմանները պահպանելու համար»,-ասաց Խոսրով Հարությունյանը:

Զրուցակիցը ընդգծեց, որ նոյեմբերի 10-ի ստորագրված համաձայնագրի շուրջ անորոշություններն այնքան շատ են, իսկ դրանք հստակեցնելու ուղղությամբ կառավարությունը պետք է քայլեր ձեռնարկեր հենց համաձայնագրի ստորագրման հաջորդ օրը:

Նախկին վարչապետը նշեց նաև՝ Հայաստանի և Ադրբեջանի սահմանին դեմարկացիա սկսվել է դեռևս 1938թ-ին, որից հետո 1984թ-ին կրկին իրականացվել են սահմանների որոշակի ճշգրտումներ և սրանց վերաբերյալ կան փաստաթղթեր.

«Այդ փաստաթղթերին, հավանաբար, այս իշխանությունները ծանոթ չեն, եթե ծանոթ լինեին, կհասկանային, որ տարածքային վեճ, գոնե Սոթքի մասով, գոյություն չունի, այդ հարցը լուծվել է դեռևս 1984թ-ին և վերահաստատվել է 88 թ.-ին»,-ասաց Հարությունյանը:

Խոսրով Հարությունյանը մեզ հետ զրույցում ընդգծեց, որ վարչապետի ստորագրած փաստաթուղթը , որը վերաբերվում է մեր տարածքային ամբողջականությանը, որևէ իրավական հիմք չի կարող ունենալ, քանի որ այն դեռ պետք է վավերացվի ԱԺ-ում և Սահմանադրական դատարանում.

«Վտանգ կա, որ այդ համաձայնագրի իրավական կոնստրուկցիան կարող է մոտ ժամանակներում դառնալ Հայաստանի, Ադրբեջանի եւ Ռուսաստանի միջև մեծ քաղաքական պայմանագրի հենք, սա կլինի անդարձելի խոչընդոտ ՀՀ-ի և Արցախի զարգացման համար:Հայաստան-Արցախ, Արցախ-Ադրբեջան հարաբերությունները պետք է իրավական պայմանագրի տեսք ստանան, այդ պայմանագրի համար պետք է լինեն բանակցություններ,իսկ եթե մնա ներկայիս կառավարությունը, ապա այս վիճելի դրույթներով փաստաթուղթը կդառնա ապագա բանակցությունների, այդ մեծ քաղաքական պայմանագրի իրավական հիմքը»,-ասաց զրուցակիցը՝ հավելելով, որ այդ պայմանագրին է միտված լինելու հետագա բանակցային պրոցեսը,ուստի անհրաժեշտ է այդ պայմանագրի մեջ ֆիքսել Արցախի կարգավիճակը,Արցախ-Հայաստան, Արցախ-Ադրբեջան հարաբերությունները.

«Այդ պայմանագիրը պետք է վավերացնի Ազգային ժողովը, Սահմանադրական դատարանը, եթե չվավերացվի, չի կարող կյանքի կոչվել, բայց եթե մնա այս իշխանությունը՝ Նիկոլ Փաշինյանը և նրա քաղաքական մեծամասնությունը, ապա հնարավոր է այդ համաձայնագիրը վավերացվի ԱԺ-ում»,-ասաց Խոսրով Հարությունյանը:

Նա հիշեցրեց, որ Նիկոլ Փաշինյանը երեկ ԱԺ-ում հայտարարել է, որ պատրաստ է ստանձնել պատասխանատվություն ժողովրդի անունից, սակայն համաձայնագիրը ստորագրելիս ժողովրդի կարծիքը հաշվի չառավ.

«Հիմա, երբ պետք է ձեր իշխանությունը արհեստականորեն ձգձգել, հղում եք կատարում ժողովրդին, ժողովրդի մասին հիշեիք փաստաթուղթը ստորագրելուց»,-ասաց Խոսրով Հարությունյանը

Աղբյուր` Փաստինֆո