Փաստ ինֆո

Մարտունու շրջանի Թաղավարդ գյուղում պատերազմի ընթացքում թեժ մարտեր են ընթացել, բայց գյուղն ամբողջությամբ փրկել չի հաջողվել։ 100 տարեկան Թաղավարդը կիսվել է՝ մի մասում ապրում են արցախցիները, մյուսում՝ ադրբեջանցիները։ 

«Մեր գյուղի երկարությունը 7 կմ է, որից 3,5-ը թուրքերինն է։ 600 բնակիչ է մնացել առանց օթևան, 135 տուն մնացել է թուրքերին, նստած են էնտեղ»,- «Փաստինֆո»-ի հետ զրույցում ասաց Թաղավարդ համայնքի ղեկավար Օլեգ Հարությունյանը։
Վեց հարյուր բնակչի կյանքն այլևս առաջվանը չի լինի, ստիպված են լինելու հույսով սպասել, մինչև իրենց նոր՝ մշտական բնակության վայր կհատկացնեն, ցավոք, նրանցից ոմանք արդեն արտագաղթել են։

«Հլը անորոշ է՝ ինչ են անելու։ Կեսը Ստեփանակերտում են, կեսը Հայաստանում, մի մասը մեկնել է Ռուսաստան։ Հույս ունենք, որ մենք ադրբեջանցիներին չենք տեսնի, որովհետև դա հնարավոր չի։ Ռուս խաղաղապահները էստեղ են, մեզ պաշտպանում են։ Ո՞նց եք պատկերացնում՝ մարդ կա երեխան է զոհվել, կամ եղբայրը՝ ո՞նց պիտի էդ մարդը ադրբեջանցու հետ շփվի»։

Կիսված Թաղավարդի մի եկեղեցի, մի ակումբ, մի դպրոց ու գերեզմանն է մնացել ադրբեջանական կողմում։ Բնակիչները հեռադիտակով հետևել են, ինչպես են իրենց տարիներով պահածն ու ստեղծածն այրվում։

«Ակումբը, 1994 թվականին զոհված ազատամարտիկների թանգարան ունեինք, դա էլ են վառել, հին գյուղապետարանի շենքը ևս վառել են։ Գյուղի կեսը վառել են, կեսում էլ նստած են»։

Գյուղում փորձում են նորից ապրել, բայց պայմաններ չկան։ Շարժիչով են ապահովում էլեկտրաէներգիան, իսկ Արցախի իշխանություններն ապահովում են սնունդով։

«Այսօրվա դրությամբ իշխանություններն օգնում են, սնունդ են տալիս, շարժիչներ են տալիս։ Ներքևի գյուղի մասին է խոսքը։ Լույս, գազ ու համարյա ջուր չկա։ Մահճակալ, անկողին, հեռուստացույց, լվացքի մեքենա կառավարությունն է օգնելու, որ հատկացնեն»։

Համայնքի ղեկավար Օլեգ Հարությունյանն էլ է տունը կորցրել, ասում է՝ ցուցաբերվող օգնությունն իրենց չի բավարարում ։

«Մեր տունը էլ չկա, արդեն վառել են թուրքերը։ Մենք հասցրել ենք մի հատ անձնագիր վերցնենք ու դուրս գանք։ Իրանք վառել են ու մեջը հիմա նստած են։ Ի՞նչը բավարարի՝ անտուն մարդիկ ենք, չգիտենք ինչա լինելու վերջը։ Մեր գյուղը պիտի հետ տան, թուրքերը պիտի հետ քաշվեն։ Սենց բան Ղարաբաղում չկա։ Գյուղը կամ իրանցնա, կամ մերը, բայց մեր գյուղը կիսվելա»։

Համայնքի ղեկավարը բնակիչների պես մի օր ապրում է բարեկամի տանը, մի օր Ստեփանակերտում։ Տունը կորցրած 600 բնակիչներից ոմանք էլ վարձով են ապրում։

«Փաստինֆո»-ն արդեն տեղեկացրել է, որ պաշտոնական Ստեփանակերտի հրապարակած տվյալների համաձայն՝ Ադրբեջանի հսկողության տակ է անցել Արցախի 118 համայնք և բնակավայր։ Այդ թվում Թաղավարդը, որի մի մասը եւս անցել է ադրբեջանցիներին։

Աղբյուր` Փաստինֆո