Փաստ ինֆո

Բաքվում տեղի ունեցածը միջանկյալ հաղթանակի շքերթ էր։ Ադրբեջանի և Թուրքիայի նախագահներն իրենց ելույթներում ցույց տվեցին, որ դեռ պետք է պայքարեն Հայաստանի դեմ։ «Փաստինֆո»-ի հետ զրույցում այս մասին ասաց թուրքագետ Անդրանիկ Իսպիրյանը։

«Ալիևը և Էրդողանն իրենց խոսքում որևէ տեղ պատերազմի վերջնական ավարտի մասին չնշեցին։ Ավելին, երկուսի խոսքում էլ կար, որ սրանով չի ավարտվում, այլ պետք է պայքարել։ Էրդողանի կողմից հիշատակվեցին Ադրբեջանին այսպես ասած հասցված վնասները, փլված շենքերը։ Այսինքն իրենց ելույթներում ցույց տվեցին, որ դեռ պետք է պայքարեն Հայաստանի դեմ։ Ի դեպ, հետաքրքիր է, որ Ալիևը փորձում էր թուրքերեն խոսել, այլ ոչ թե ադրբեջաներեն»,-նշեց թուրքագետը։

Անդրադառնալով Ալիևի ելույթի այն հատվածին, որտեղ վերջինս ասում է՝ Զանգեզուրը, Գյոյչան, Իրևանի շրջանն իրենց պատմական հողն է, Անդրանիկ Իսպիրյանը նկատեց՝ սա ցույց է տալիս, որ ստորագրված եռակողմ փաստաթուղթը խաղաղության փաստաթուղթ չէ․ «Ալիևն էլ իր ելույթում ասաց՝ կապիտուլյացիա է ստորագրել Հայաստանի վարչապետը։

Այսինքն՝ այն խաղաղության, հաշտության մասին չէ։ Դե ֆակտո պատերազմը դեռ շարունակվում է։ Չկա ո՛չ գրավոր փաստաթուղթ, ո՛չ որևէ հայտարարություն, որ պատերազմն ավարտվել է և պետք է խաղաղություն լինի»,-ասաց թուրքագետը՝ նշելով, որ պատերազմի վտանգը կա, սակայն կլինի, թե ոչ՝ դա այլ հարթությունում է և ըստ նրա՝ ամեն ինչ կախված կլինի Հայաստանի հետագա վարած քաղաքականությունից տնտեսական, քաղաքական, ռազմական, արտաքին քաղաքականության ոլորտներում։

Հարցին՝ արդյոք Հայաստանի վարած քաղաքականությունն ինչ-որ կերպ կկարողանա՞ զսպել Էրդողանի մեծ ցանկությունները, Անդրանիկ Իսպիրյանը նկատեց՝ քաղաքականության մեջ ոչինչ չեն բացառում․ «Հնարավոր չէ ասել՝ այո հենց լինի, ուրեմն էլ պատերազմ չի լինի, բայց գոնե դրանով երկրի անվտանգությունը պետք է մաքսիմալ ապահովել։ Խոսքը սրա մասին է, որ Հայաստանը կարողանա հավանական պատերազմների ժամանակ իր անվտանգությունը մաքսիմալ ապահովել։ Սա է կարևոր»,-ասաց թուրքագետը։

Անդրադառնալով հարցին՝ հիմա գնու՞մ ենք այդ ուղղությամբ, թուրքագետն ասաց․ «Այս կառավարության պայմաններում ոչ։ Այսինքն` մինչև հիմա չենք գնացել, հետո չգիտեմ»։

Անդրանիկ Իսպիրյանը չի կարծում, որ առաջիկա 6 ամսվա մեջ նոր պատերազմ կլինի։ Նրա խոսքով Ադրբեջանը ևս պատերազմում բավականին հյուծվել է և խոսել, որ հենց 6 ամսվա ընթացքում կվերականգնվի և ունակ կլինի նոր պատերազմ վարել, տեղին չէ․ «Իրենց էլ է ժամանակ պետք։ Բացի այդ հաշվի առնենք, որ Ռուսաստանը հայտարարել է, որ Հայաստանի դեմ ոտնձգությունները Ռուսաստանի խառնվելու համար ուղիղ առիթ են։ Այս դեպքում չեմ կարծում, որ 6 ամսվա կտրվածքով պատերազմ կլինի»,-ասաց Անդրանիկ Իսպիրյանը։

Ինչ վերաբերում է նրան, որ Էրդողանի ցանկությունը չի սահմանափակվում միայն Արցախով, թուրքագետն ընդգծեց՝ թուրք-ադրբեջանական տանդեմի նկրտումներն ու ցանկություններն ավելին են, քան այս պատերազմում ստացածը։

Հիշեցնենք, որ այսօր Բաքվում տեղի ունեցավ հաղթանակի շքերթ, որին մասնակցում էր նաև Թուրքիայի նախագահ Ռեջեփ Թայիփ Էրդողանը։

Աղբյուր` Փաստինֆո