Փաստ ինֆո

Սա ուղղակի ԱԺ հերթական հարցուպատասխանի ընթացքում հանրությանը փոխանցված տպավորություն չէ, այլ՝ իրականություն, որի հետ Փաշինյանը առերեսվում է և այդ առերեսումն ամեն օր և ամեն ժամ ավելի ու ավելի հստակ է դարձնում նրա հրաժարականը։

Պատերազմում պարտված, պարտության և ձախողման, նվաստացման խորհրդանիշ՝ այս և այսօրինակ բնորոշումների պակաս չեղավ այսօրվա ԱԺ հարցուպատասխանի ժամանակ, որի ընթացքում պատասխանողի դերում կամ կարգավիճակում վարչապետի պաշտոնը դեռևս զբաղեցնող Նիկոլ Փաշինյանն էր։

Իրականում, մինչ Ազգային Ժողովի մատույցներում Հայրենիքի փրկության շարժման հոծ բանակն էր պահանջում Փաշինյանի հրաժարականը՝ «Հայաստան, ոտքի», «Հայաստանն առանց Նիկոլ» կարգախոսների ներքո, Լուսավոր Հայաստանի պատգամավորները ԱԺ դահլիճում էին նեղը գցել Նիկոլ Փաշինյանին, վերստին, նորից ու կրկին հիշեցնելով նրան, որ իր գոյությամբ պարտություն մարմնավորող, պարտվողի հոգեբանությունը ազգի վրա տարածող ղեկավար չի կարող ունենալ Հայաստանը, որ իր հեռացումը մոտ է, պարզապես իրատես պիտի լինել՝ այն տեսնելու և հասկանալու համար։

Սակայն, ըստ ամենայնի, երբեմնի ընդդիմադիր գործչից այլևս ոչինչ չպահպանած և այդպես էլ պետական գործչի գիտակցում չունեցող Փաշինյանը նորից կառչում է ժողովրդից, օգնության է կանչում ժողովրդին, ընդ որում, շատ դժվար է այսօր հասկանալ, թե՝ ո՞ր ժողովրդի մասին է խոսում Փաշինյանը, երբ ասում է, թե իր հրաժարականը պահանջողները ժողովուրդը չեն։ Արդ, ո՞րն է, ովքե՞ր են այսօր Փաշինյանի ժողովուրդը՝ իր հրամանով աթոռներին սոսնձված քպականնե՞րը, մինչև վերջ պարգևավճարներին կուլ գնացող և անգամ «Հայաստան» հիմնադրամի գումարներն իբրև պարգևավճար ստացող կառավարության անդամնե՞րը, թե՞ ֆեյսբուքում դեռ մնացած վճարովի ֆեյքերի ծվենները՞ և կամ՝ հրապարակում «թոփ-թազա» կոմուֆլյաժ, բրոնեժիլետ հագած, իբր՝ Ղարաբաղում կռված՝ «լյումպենը» որ դիրքերում խորոված է կերել ու որի համար Քարվաճառը Ջաբրայիլն է և վերջ․․․Ա՞յս ժողովրդի․․․

Փաշինյանի պատճառաբանություններն ուղղակի ծիծաղելի են, թե՝ ու՞մ է ներկայացնում ժամանակավոր կառավարության վարչապետը /իմա՝ Վազգեն Մանուկյանը/, թե՝ օրենքի և իրավունքի խնդիրներ կան, ճիշտը արտահերթ ընտրությունների գնալն է և այլն, և այս կարգի ցանկություններ։

Իրո՞ք։ Սա այն դեպքն է, որ չես կարող չասել, իսկ երբ ինքը ՀՀԿ-ի կողմից ուղղակի «նշանակվեց» վարչապետ, միթե՞ օրենքի և իրավունքի հետ որևէ կապ ուներ։ Եվ ընդհանրապես, Հայաստանը կրա՞կն է ընկել Փաշինյանի ձեռքը։ Թե՞ նրա նպատակն իր հրաժարականն անիմաստ ձգել- ձգձգելով արտահերթ ընտրություններում պետական համակարգն օգտագործելն է․․․Հակառակ դեպքում, պարտված իշխանության ղեկավարի խաչը պիտի տաներ՝ իր հեռացումով և ապա՝ ընտրություններում եթե կարող էր, եթե դեռ ընտրազանգված ուներ՝ լեգիտիմ ձայներով վերադառնալով։

Եվ ընդհանրապես, օրենքից և իրավական թեմաներից խոսող Փաշինյանին ԱԺ-ում ԼՀԿ ներկայացուցիչները բացատրեցին, որ իր ստորագրած կապիտուլյացիոն պայմանագիրը մի փաստաթուղթ է, որը մի քանի դրվագով է խախտում միջազգային իրավունքը, բացի այդ, խախտում է նաև ՀՀ Սահմանադրությունը։ Ավելին, որ այն դեռ մեր օրենսդրությամբ սահմանված կարգով ուժի մեջ չմտած՝ վարչապետի կամոք գործում է արդեն, կիրարկվում է՝ ներգրավելով ողջ գործադիր համակարգը։

Իսկ սա նշանակում է, որ մենք՝ քաղաքական, այլ ոչ՝ իրավական ֆիգուր հանդիսացող երկրի պարտված վարչապետի մի ստորագրությամբ, մեր պետության իսկ շահերին դեմ ենք գնում, ընդ որում, խախտելով և՛ մեր մայր օրենքը, և՛ միջազգային օրենսդրությունը։

Այն դեպքում, երբ նման փաստաթղթերը մեր օրենսդրությամբ անպայման ԱԺ վավերացում և ՍԴ դրական եզրակացություն են պահանջում։ Հետաքրքիր է՝ օրենսդիր և գործադիր իշխանությունն ինչո՞վ է զբաղված, եթե այս պարզ ճշմարտությունները Փաշինյանին չի բացատրել։ Թե՞ ինչպես մնացած դեպքերում, այստեղ էլ գործել է «ինձանից հետո թեկուզ ջրհեղեղ» մոտիվացիան։

Ըստ որի Փաշինյանը կհեռանա, սակայն իր ստորագրած սև փաստաթղթի իրավական և անօրինական հետևանքները Հայաստանին ժառանգություն կթողնի։
Փաշինյանն արդեն համակերպվել է հեռանալու մտքի հետ, բայց որքան շուտ հեռանա, այնքան իր ավերից ավելի շուտ կկարողանանք վեր հառնել։ Առանց իրեն։

Հեղինակ՝ Ա․Ե․

Աղբյուր` Փաստինֆո