Փաստ ինֆո

«Հնչած սուտը ընդամենը ձև է փակ նիստում մեզ պատժելու համար։ Այ տեսեք, դուք նիստը փակ եք անում, հետևաբար ես նիստից դուրս կգամ և ձեզ կվերագրեմ մի սուտ միտք, դե հիմա եկեք դրա տակից դուրս եկեք»,- Ազգային ժողովի «Իմ քայլը» խմբակցության պատգամավոր Մարիա Կարապետյանը հերքում է, թե խորհրդարանի փակ նիստում ասել է, որ Ադրբեջանում հայ գերիներին լավ են վերաբերվում: Դեկտեմբերի 8-ին կայացած փակ նիստից հետո նման հայտարարություն Մարիա Կարապետյանի անունից արել էր «Լուսավոր Հայաստան» խմբակցության պատգամավոր Անի Սամսոնյանը:

«Այն հոլովակներից հետո, որ պտտվում են մեր գերիների մասով, երևակայությունից դուրս է, որ Ազգային ժողովի որևէ պատգամավոր ասեր, որ մեր գերիներին լավ են վերաբերվում: Այս վերագրումը չի կարող հիմք ունենալ»,- ասաց Կարապետյանը:

Վերջինս նշեց, որ ստիպված է անցնել՝ «Ինքն ասաց, ես ասացի» բովանդակության պարզաբանման. 

«ԱԺ-ն փակ նիստից հետո կոչ հրապարակեց։ Սա ըստ էության նամակ է, որը կարելի է ուղղել նաև առանց նիստը անելու ու առանձին հարց է, թե ինչ տեղեկություններ ունի պետությունը ռազմագերիների մասին։ Եթե նույնիսկ Ադրբեջանում մեկ ռազմագերի կա, կարելի է այդ նամակն ուղարկել։ Մենք առաջարկեցինք, որ նիստը փակ կայանա, որպեսզի այդ հարցերի պատասխանները հնարավոր լինի հնչեցնել, քանի որ զգայուն հարցեր են։ Ես ենթադրում եմ, որ միաձայն ընդունմանը պատրաստ չէր «Լուսավոր Հայաստան»ը։ Գուցե ընդդիմադիր երևալու բարդույթը չհաղթահարելու պատճառով ԱԺ նիստը երեկ բացվեց սկանդալով՝ կրկին նիստի փակ, կամ բաց լինելու թեմայով վեճ առաջացավ։ Ես ասացի, որ դրա մասին աղմուկ-աղաղակ ստեղծելը ընդամենը հերթական անգամ գերիների հարցի շուրջ քաղաքական դիվիդենտներ շահելու փորձ է»,- ասաց Կարապետյանը։

Ըստ նրա՝ փակ նիստի ժամանակ Էդմոն Մարուքյանն ասել է, թե պատգամավորը չպետք է նման հայտարարություն անի, վերջինս էլ պատասխանել է՝ «եթե շարունակեն շահարկել հարցը, ապա ինքն էլ շարունակելու է օրինակներ բերել, թե ընդդիմադիրները ինչպես են քաղաքական դիվիդենտներ հավաքում գերիների հարցի շուրջ»։ Մարիա Կարապետյանը հավելեց, որ նիստի ընթացքում ինքն իրականությանը չհամապատասխանող է համարել ԼՀԿ ղեկավար Էդմոն Մարուքյանի այն պնդումը, թե Ադրբեջանում պատրաստվում են շքերթի ընթացքում քայլեցնել հայ գերիներին, ինչից հետո էլ Մարուքյանն իրեն անվանել է «թրքասեր» և «ադրբեջանասեր»:

«Խնդրի մասին բարձրաձայն աղաղակելը և փակ նամակով գրելը՝ միջազգային դերակատարների տեսանկյունից նույն ազդեցությունն էր ունենալու»,- ասաց իմքայլական պատգամավորը, հավելելով, որ Մարուքյանը շքերթի մասին սուտ տեղեկությունը հանրայնացրել է՝ դառնալով ամենալուրջ աղբյուրը, որը խոսել է այդ մասին, ապա հերոսաբար այդ խնդիրը լուծել։

Աղբյուր` Փաստինֆո