Փաստ ինֆո

Արցախյան պատերազմի վերաբերյալ «Ազգային անվտանգություն» կուսակցության նախագահ Գառնիկ Իսագուլյանի աղմկահարույց բացահայտումներում քննիչը հանցադեպ չի տեսել, մերժել է քրեական գործի հարուցումը ու քրեական գործ է հարուցել Իսագուլյանի դեմ՝ սուտ մատնություն կատարելու հատկանիշներով։

Հիշեցնենք, որ նոյեմբերի 23-ին Գառնիկ Իսագուլյանը հրավիրված մամուլի ասուլիսի ընթացքում հանդես էր եկել աղմկահարույց հայտարարություններով, մասնավորապես նշել էր, որ հակառակորդի 400 հոգանոց խումբը Հադրութ քաղաք է մտել թիկունքից՝ Նախիջևանից Քաջարանով անցել է Արցախ և առանց խոչընդոտ գնացել մինչև Հադրութի թիկունք։ Բացի այդ նշել էր, որ ԱԱԾ այն ժամանակվա տնօրեն Արգիշտի Քյարամյանը անձնագրային բաժանմունքների ղեկավարների միջոցով 1400 հայկական անձնագիր է բաժանվել հայերեն իմացող ադրբեջանցիների։ Մյուս աղմկահարույց բացահայտումը վերաբերում է Շուշիին։ «Երբ թուրքական ստորաբաժանումները մտել են Շուշի, դրանից մեկ օր հետո Շուշին ազատագրվել է, սակայն հետո եղել է նահանջի հրաման: Ստեփանակերտի մատույցներում գտնվող մեր զորքին չի զգուշացվել, որ Շուշիից նահանջողները ոչ թե ադրբեջանցիներ են, այլ հայկական զորքն է, որին հրամայված է Շուշիից նահանջել:Միմյանց վրա կրակելուց ունեցել ենք բավականին մեծ թվով զոհեր, հայերը կրակել են հայերի վրա, սա եղել է Նիկոլ Փաշինյանի հրամանով»,- հայտարարել է Իսագուլյանը։

«Փաստինֆո»-ի հարցին ի պատասխան ՀՔԾ-ից հայտնեցին, որ Գառնիկ Իսագուլյանի ասուլիսի վերաբերյալ հրապարակումների առթիվ ՀՔԾ-ում նախապատրաստված նյութերի հիման վրա քննիչի կողմից որոշում է կայացվել՝ քրեական գործի հարուցումը մերժելու մասին՝ հանցադեպի բացակայության հիմքով։ Քրեական գործ է հարուցվել սուտ մատնության հատկանիշներով։

Աղբյուր` Փաստինֆո