Փաստ ինֆո

Այս պահին բոլորովին անհայտ է՝ինչ հիմունքների վրա պետք է կառուցվեն տարածաշրջանի երկրների, հատկապես՝ Ադրբեջանի հետ Հայաստանի հարաբերությունները, քանի դեռ ՀՀ-ն չի արտահայտել իր հստակ դիրքորոշումը Արցախի հետագա ճակատագրի հետ կապված, ուստի նման հայտարարությունները ոչ միայն տեղին չեն, այլ նաև զուրկ են որևէ գիտական և դիվանագիտական հիմքից:Այս մասին «Փաստինֆո»-ի հետ զրույցում ասաց թուրքագետ Վարուժան Գեղամյանը՝ անդրադառնալով ԱԺ «ԻՄ քայլը» խմբակցության պատգամավոր Անդրանիկ Քոչարյանի այն հայտարարությանը, որ Հայաստանը պետք է փորձի երկխոսություն սկսել հաղթող կողմի՝Ադրբեջանի հետ, որքան էլ դա ծանր լինի:

Փորձագետը վստահեցնում է՝ նման հայտարարությունները չեն կարող դրական ազդել ռազմագերիների փոխանակման գործընթացի վրա, հատկապես, որ դրանք հստակ մոնիթորինգի են ենթարկվում հակառակորդի կողմից:

«Նման հայտարարությունները ցույց են տալիս, որ ներկայիս իշխանությունները պատկերացում չունեն ոչ միայն ստեղծված իրավիճակի, այլ՝ դրա հետագա հնարավոր սցենարների զարգացումների վերաբերյալ,չկա հստակ պատկերացում տարածաշրջանային անվտանգության սպառնալիքների, տնտեսական իրավիճակի մասին»,-մեզ հետ զրույցում ասաց Վարուժան Գեղամյանը:

Թուրքագետն արձանագրում է՝այսպիսի հայտարարությունները հիմնված են ոչ թե ստեղծված իրավիճակի լավ վերլուծության, այլ՝ ինչ-որ մեկի անձնական ցանկությունների վրա.

«Կարծում եմ, եթե նախկինում նման շքեղության իրավունք չունեինք, ապա առավել ևս հիմա նման հանդուգն սխալականությամբ փորձել նման բաների մասին դատողություններ անել և դրա հիման վրա կառուցել քաղաքականություն՝ խիստ վտանգավոր է»,-ասաց Գեղամյանը:

Վերջինիս դիտարկմամբ՝ նման հայտարարությունները միջազգային հանրության մոտ տպավորություն են ստեղծում, որ մենք համակերպվել ենք ստեղծված իրավիճակի և պարտության հետ.

«Այսպիսի հայտարարությունները խոչընդոտում են դիվանագիտական աշխատանքին, քանի որ, եթե հստակ դիրքորոշում չես հայտնում և միևնույն ժամանակ անում ես հայտարարություններ, որոնք հակասում են քո դիվանագիտության ներկայացրած դրույթներին, ապա խնդրահարույց իրավիճակ է ստեղծվում»,-նշում է փորձագետը՝ հավելելով, որ տարածաշրջանի ցանկացած երկրի, հատկապես՝ թշնամի երկրների հետ հարաբերությունների կառուցումը պետք է լինեն բոլորովին նոր հիմքերի վրա.
«Այդ հարաբերությունները պետք է հիմնված լինեն հայկական շահի իրատեսական գնահատման վրա, դրանց հիմքում պետք է լինի Հայաստանի տարածաշրջանային քաղաքականության ընդհանուր տրամաբանությունը, առանց այդ ամենի որևէ նման նախաձեռնություն դատապարտված է անհաջողության»,-ասաց Վարուժան Գեղամյանը:

Աղբյուր` Փաստինֆո