Փաստ ինֆո

«Հաշվի առնելով, որ Ми-24-ը թռել է Էրեբունի ավիաբազայի ռուսասական սեկտորից, որից ցանկացած թռիչք նույնիսկ խաղաղ ժամանակ դիտարկվում է ռադիոլոկացիոն, ինչպես նաեւ թուրքական կողմի՝ Արարատ լեռան վրա  տեղակայված օպտիկական համակարգերով, տարօրինակ է ենթադրել, որ ադրբեջանա-թուրքական դաշինքը տեղյակ չի եղել, թե հատկապես ո՞ր օդանավն է լքել ռազմական օդանավակայանը»,-այս մասին բարձրաձայնում են Wargonzo նախագծի անդամները,  անդրադառնալով Հայաստանի տարածքում ռուսական ուղղաթիռի խոցմանը, որի ոչ պատահական լինելու մասին հայտնել է ռազմական փորձագետ Ալեքսեյ Լենկովը։

Բացի այդ, ՊՆ-ում wargonzo-ի աղբյուրները հայտնում են, որ Ադրբեջանի հակաօդային պաշտպանության ծառայություններն ամբողջ երթուղու ընթացքում հետևել են ուղղաթռին եւ ՄԻ-24-ը խոցվել է խոցման գոտուց դուրս գալուց երկու-երեք վայրկյան առաջ:

«Այսպիսով, ռուս օդաչուները զոհվել են ոչ թե «դժբախտ պատահարի» հետևանքով, այլ ադրբեջանա-թուրքական հրամանատարության կողմից կազմակերպված,  ծրագրված հարձակման կամ ռազմական սադրանքի արդյունքում։ Չէին կարող չիմանալ, թե հատկապես ինչ շարասյուն է ուղեկցել ՌԴ օդատիեզերական Ми-24-ը: Այդ կապակցությամբ պաշտոնական Բաքվի դիրքորոշումը կրկնակի ցինիկ է թվում»,- գրել են նախագծի տելեգրամի ալիքում։

Հիշեցնենք, որ նոյեմբերի 9-ին ռուսական 102-րդ ռազմական բազայի ավտոշարասյանն ուղեկցող Ми-24 ուղղաթիռը ենթարկվել է շարժական զենիթահրթիռային համակարգի կրակային ազդեցության Հայաստանի օդային տարածքում՝ Երասխ բնակավայրի մոտակայքում, Նախիջևանի ինքնավար հանրապետության սահմանին մոտ: Խոցվելու հետևանքով ուղղաթիռը կորցրել է կառավարումը և ընկել է Հայաստանի տարածքում՝ լեռնային տեղանքում։ Հետագայում հայտնեցին երկու օդաչուի մահվան մասին։

Աղբյուր` Փաստինֆո