Փաստ ինֆո

«Այն, որ այսօր Նիկոլ Փաշինյանն արտաքին աշխարհի ղեկավարներից ամենամտերիմ հարաբերությունների մեջ է Ալիևի և Էրդողանի հետ, սա միանշանակ և 100 տոկոս է: Հետևաբար, երբ մենք փորձում ենք հասկանալ՝ ինչո՞ւ ոչ մի կերպ հրաժարական չի ներկայացնում կապիտուլյացիա ստորագրած վարչապետը և, արդյո՞ք սա կարող է կապված լինել այն հանգամանքով, որ նա դեռևս չի ավարտել գաղտնի պայմանավորվածությունների արդյունքում տարածքների հանձնման իր դավաճանական գործողությունները, ապա հարցն ավելի արդիական է դառնում, - «Փաստինֆո»-ի հետ զրույցում ասել է «Ազգային անվտանգություն» կուսակցության նախագահ Գառնիկ Իսագուլյանը։

Ըստ նրա՝ երբ փորձում ենք հասկանալ, թե էլ ի՞նչ վտանգներ կարող են կախված լինել Հայաստանի և հայ ժողովրդի գլխին, ապա պետք է վերլուծել, թե որո՞նք են այս տարածաշրջանում Թուրքիայի և Ադրբեջանի տարածքային և քաղաքական շահերը: Այդ հարցն էլ, իր հերթին, ունի միանշանակ պատասխան՝ իհարկե Սյունիքի, կամ դրա մասնավոր մի հատվածի՝ Զանգեզուրի յուրացումը:

«Ուրեմն, երբ դուք հարց եք տալիս՝ արդյո՞ք վտանգված է Հայաստանի Հանրապետության միջազգայնորեն ճանաչված սահմանների ամբողջականությունը ես պատասխանում եմ՝ այո, միանշանակ: Այս իշխանության հաջորդ քայլը պետք է լինի Հայաստանի հարավային սահմանների՝ Սյունիքի կամ դրա մի հատվածի հանձնումը Ադրբեջանին, այնպես, ինչպես դա տեղի ունեցավ Արցախի պարագայում: Իրականում այդ պրոցեսն արդեն տեղի է ունենում, մենք տեսնում ենք, թե ինչ է կատարվում Հայաստանի հարավային սահմաններին: Այսպիսի պայմաններում առնվազն հարց է ծագում՝ իսկ որտե՞ղ է Ազգային Անվտանգության Ծառայությունը, բայց այս հարցի պատասխանն էլ, ցավոք հայտնի է՝Փաշինյան Նիկոլի գրպանում: Այնպես որ, քանի դեռ Հայաստանի Հանրապետությունը Թուրքիայի և Ադրբեջանի հետ սերտ ու բարի համագործակցող այս իշխանության ձեռքին է, վտանգված է նույնիսկ մեր պետականության և լինելիության հարցը»,- ընդգծել է Գառնիկ Իսագուլյանը:

Աղբյուր` Փաստինֆո