Փաստ ինֆո

«Ժողովուրդ ասելով շահարկում եք ժողովրդի գործոնը։ Որ ասում եք ժողովուրդ՝ ձեր հրաժարականի պահանջը ներկայացնող մարդիկ ժողովրդի ոչ մի սեգմենտ չեն ներկայացնո՞ւմ. ԱԺ-Կառավարություն հարցուպատասխանի ժամանակ «Լուսավոր Հայաստան» խմբակցության ղեկավար Էդմոն Մարուքյանը հարց ուղղեց վարչապետին, երկար ցանկով թվարկեց, թե ովքեր են պահանջում Փաշինյանի հրաժարականը։

«Ես էլի պետք է հղում անեմ ժողովրդին, որովհետև շատ կարևոր է ընդգծել մի հանգամանք՝ իսկ ինչո՞ւ դուք, այդ թվում՝ խորհրդարանական ուժերը, չեն պահանջում օրինակ արտահերթ խորհրդարանական ընտրություններ, իսկ ինչո՞ւ այդ քաղաքական ուժերն ու էլիտայի ներկայացուցիչներն անընդհատ առաջարկում են սցենարներ, որոնք ունեն միայն մի նպատակ՝ ժողովրդին դուրս թողնել պրոցեսից, ընդ որում՝ անվերադարձ», - ասաց Փաշինյանը, հավելելով, թե ընդդիմադիր քաղաքական ուժերն առաջարկում են Հայաստանում ստեղծել անիշխանություն կամ «խամաճիկային» իշխանություն։

«Ինչու, որովհետև առաջադրում են վարչապետի թեկնածու, որը չունի ժողովրդի աջակցությունը, որը չունի հենարան խորհրդարանումում, որը չունի նույնիսկ հեռանկար՝ արժանանալու ժողովրդի աջակցությանը, որովհետև պայման է դրվում, որ այդ թեկնածուն պետք է ընտրություններին չմասնակցի, հետևաբար, այս պայմաններում եթե տեղի ունենա փոփոխություն ու նշանակվի այդպիսի վարչապետ, որը չունի հենարան, լեգիտիմության ոչ մի աղբյուր, ո՞ւմ վրա է հենվելու ու ո՞ւմ է պատկանելու իշխանությունը, իհարկե, իշխանությունը պատկանելու է այն ուժերին, որոնք նրան բերելու ու այդ կարգավիճակին են հասցրել», - ասաց Փաշինյանը։

Նա հավելեց, որ այդ մեկ տարվա ընթացքում վերականգնվելու են ընտրակեղծարարության բոլոր հնարավոր մեխանիզմները, որպեսզի Հայաստանը կրկին վերադարձվի ընտրակեղծարարության փուլ։

«Էդ մարդկանց, ըստ էության, 100 տոկոսը, ովքեր հրաժարական են պահանջում, էն մարդիկ են, ովքեր 2018 թվականի հունիսին արդեն հրաժարական էին պահանջում, նրանց մի մասը ներքուստ էր պահանջում, մի մասը՝ հրապարակային, հիմա ուղղակի առիթ է, որպեսզի այդ պահանջը բարձրաձայնվի։ Եթե հետ նայենք՝ պատերազմից առաջ՝ կտեսնենք կազմը և ասելիքը չի փոխվել։ Ես չեմ ասում՝ 7 տոկոսանոց ուժը ոնց կարա ժողովրդի անունից խոսա, ես ասում եմ՝ ժողովրդի անունից կարող է խոսել ժողովուրդը», - ասաց վարչապետը։
ԼՀԿ ղեկավարը պատասխանեց՝ ընտրություններ այս պահին դժվար է կազմակերպել, որովհետև կան բազմաթիվ զինված խմբեր, այդ թվում՝ Փաշինյանի կողմնակից զինված խմբեր։

«Այդ զինված խմբերը մինչև չզինաթափվեն, այո, ընտրություններ չի կարելի անել, զինաթափեք այսօր ու վաղը արեք ընտրություններ։ Դա մեր պահանջն է։ Դուք էլ եք Լևոն Տեր Պետրոսյանի հոդվածի գծի մեջ, որ մենակ դուք եք ու ուրիշ թեկնածուներ չկան, մենք էլ ենք թեկնածու առաջարկել՝ մյուս ընտրություններին մասնակցելու ենք, կարող ենք զինաթել նրանց, որոնց չեք կարողանաում զինաթափել։ Չունեք իշխանություն», - ասաց Մարուքյանը։

Նիկոլ Փաշինյանն էլ ասաց՝ իրենք զինված կողմնակից չունեն, բայց զինված խմբերը կզինաթափվեն ու զինաթափվում են։ Վարչապետը հայտարարեց, թե իրենք կազմակերպել ու ի վիճակի են կազմակերպել ազատ ընտրություններ։

Աղբյուր` Փաստինֆո