Փաստ ինֆո

«Ինչպե՞ս եք տեսնում այս պայմաններում Արցախի ժողովրդի ինքնորոշման իրավունքի իրացումը»,-այս մասին խորհրդարանում «Լուսավոր Հայաստան» խմբակցության պատգամավոր Արկադի Խաչատրյանը հարցրեց Վարչապետ Նիկոլ Փաշինյանին։

Վերջինս հիշեցրեց, որ Արցախի հարցի կարգավորման բանակցային ողջ գործընթացում փախստականների վերադարձը և ներքին տեղահանվածների վերադարձը եղել է առանցքային սկբունքներից մեկը։

Հարցին՝ արդյոք Փաշինյանը շարունակում է մնալ այն կարծիքին, որ Արցախի խնդրի լուծումը պետք է բավարարի Հայստանի, Արցախի և Ադրբեջանի ժողովրդին, թե հրաժարվել է այդ թեզից, Փաշինյանը պատասխանեց.

«Այո, ես շարունակում եմ մնալ այն կարծիքին, որ Ղարաբաղի հարցի լուծումը պետք է ընդունելի լինի Արցախի, Հայաստանի ու Ադրբեջանի ժողովրդի համար: Ինչ վերաբերում է մնացած հարցերին, դրանք բանակցային նրբություններ են, որոնք պետք է ճշգրտվեն՝ հընթացս բանակցությունների՝ այդ թվում սահմանների ճշգրտումը»:

Արկադի Խաչատրյանը հիշեցրեց, որ ձախողել են, բայց արդյոք վարչապետը ընդունո՞ւմ է այդ գնահատականը։ Վարչապետն ասաց, որ չի կարող ասել, որ ամեն ինչ կատարյալ ու ճիշտ են արել, բայց իրեն զարմացնում է այն, որ Հայաստանում իշխանության եղած շատ ուժեր և մարդիկ պնդում են, որ իրենք ամեն ինչ շատ ճիշտ են արել։

«Այո, մենք ձախողել ենք, որ 2.5 տարվա ընթացքում չենք հասցրել այն, ինչ որ չի արվել վերջին 20 տարվա ընթացքում: Բայց մենք պատրաստ ենք և կկանգնենք ժողովրդի դատի առաջ: Որովհետև, այո, ժողովուրդը պետք է և իրավունք ունի դատել, ժողովուրդն իրավունք ունի և ժողովուրդը կդատի, և մենք խոնարհ կընդունենք այդ դատավճիռը»,- նշեց վարչապետը:

Աղբյուր` Փաստինֆո