Փաստ ինֆո

Բոլոր այն անձինք, որոնք պաշտպանում են դավաճանին, կրկնակի դավաճան են։ Բոլոր այն պատգամավորները, որոնք ազգային արժանապատվությունը բարձր են գնահատում՝ այս պահին պաշտոնանկ արեք Նիկոլ Փաշինյանին, դուրս եկեք ժողովրդի մեջ և,  որպես պատգամավորներ, որոնք Սահմանադրության համաձայն ներկայացնում են ժողովրդին, ներկայացրեք ձեր տեսակետները՝ դուք դավաճանի կողմն եք, թե արժանապատիվ ժողովրդի։ Այս մասին Փաշինյանի հրաժարականի պահանջով հանրահավաքի ընթացքում ասաց ՀՅԴ ԳՄ անդամ Արծվիկ Մինասյանը՝ դիմելով ԱԺ «Իմ քայլը» խմբակցության պատգամավորներին։ 

Դիմելով այն պատգամավորներին, որոնք մտածում են, որ այս ամենը կանցնի՝ Մինասյանն ասաց, որ այս ամենն անցնել չի կարող, որովհետև կպել են հայոց ազգի ամենանուրբ լարին։  Հայրենադավությունը և հող տալը չի ներվելու, մեր ազգի զավակների նահատակությունը չի ներվելու, գերեվարված, անհայտ կորած մեր քաղաքացիների, մեր զինվորների ճակատագիրը չի ներվելու ձեզ, հետևաբար  պետք է դուրս գան՝ կամ   Փաշինյանին հիմա պաշտոնանկ անեն կամ ժողովրդին բացատրեն, թե ինչու են կանգնած վերջինիս կողքին։

Մինասյանը դիմեց նաև իրավապահ մարմիններին,  նշելով, որ հանդիպում են պահանջում ԱԺ պատգամավորների հետ, ժողովրդի ներկայացուցիչների հետ, նրանք պետք է ժողովրդի կամքն իրացնեն, հակառակ դեպքում՝ նրանք նույնպես կհայտնվեն պատմության աղբարկղում։

«Արժանապատիվ պետության ոստիկանություն,  պետք է աջակցել, չթողնել որևէ պատգամավորի, որ առանց ժողովրդի հետ հանդիպման  ճողոպրի արանքը։ Չթողեք երկրի վարչապետ ինքնահռչակված Նիկոլ Փաշինյանին դուրս գալ շենքից, քանի դեռ չի հանդիպել ժողովրդին և չի ներկայացրել իր պատկերացումները»,- ասաց Մինասյանը։

Աղբյուր` Փաստինֆո