Փաստ ինֆո

Սյունիքի Զանգերի մուտքի մոտ որոշակի հատվածներում GPS-ը ցույց է տալիս Ադրբեջան։ Հնարավո՞ր է, որ GPS-ով դեմարկացիայի ժամանակ ադրբեջանցիները հասնեն մինչև մայրուղի և ստիպված լինենք սիսիանցիներով գնալ ու պարզաբանում տալ, որ դա մեր տարածքն է։ Այս մասին ԱԺ-ում ասաց «Լուսավոր Հայաստան» խմբակցության պատգամավոր Սրբուհի Գրիգորյանը։

ՀՀ փոխվարչապետ Տիգրան Ավինյանը նշեց, որ ՀՀ-ի և Ադրբեջանի միջև սահմանազատման իրավական փաստաթուղթ ընդունված չէ։ Փոխվարչապետի խոսքով այդ գործընթացում կարևոր են բանակցությունները․

«Բանակցությունները տեղի են ունենալու ամենասեղմ ժամկետներում։ Այդ բանակցությունների արդյունքում իրականացնելու ենք սահմանազատում և տեղի է ունենալու դեմարկացիա։ Ըստ այդ պայմանավորվածությունների և փաստաթղթերի, որ կընդունվեն մեր և Ադրբեջանի ԱԺ-ների կողմից, կհստակեցվի իրավական սահմանը երկու երկրների միջև։

Այն գործընթացները, որոնք տեղի են ունեցել նոյեմբերի 10-ից հետո, դրանք երեք երկրների ղեկավարների հայտարարության հիման վրա տեղի ունեցած ժամանակավոր գործընթաց էին, որոնք իրավական, իրենց վերջնական տեսքը ստանալու են բանակցությունների արդյունքում իրականացված սահմանազատման փաստաթղթի տեքստում»,-նշեց Տիգրան Ավինյանը։

Պատգամավորը հետաքրքրվեց՝ այդ պայմանավորվածությունների հիմքում ի՞նչն է դրվելու՝ GPS-ը, 1990-ականների Հայաստանի սահմանները, թե ՀՀ-ում սահմանների մասին օրենքը։

Փոխվարչապետը նշեց, որ դոմարկացիայի գործընթացը բավականին բարդ է․ «Տարիներով երկրները, մենք մեր հարևան երկրների հետ, Ադրբեջանն իր որոշ հարևան երկրների հետ մինչ այսօր վերջնական այդ գործընթացը չի իրականացրել։

Փաստաթղթերը, որոնք լինելու են հիմքում, դրանք քարտեզներ և փաստաթղթեր են, որոնք ընդունվել են 20-րդ դարասկզբին, բայց չի նշանակում, որ այլ փաստաթղթեր չկան բանակցությունների սեղանին։ Այդ հիմնավորումներով և փաստաթղթերով, երկու կողմերն իր փաստարկներով պետք է հանդիպեն և իրականացնեն սահմանազատման գործընթաց»,-ասաց Տիգրան Ավինյանը։

Աղբյուր` Փաստինֆո