Փաստ ինֆո

Ինչու՞ են մեր սահմանամերձ շրջանների բնակիչներն ադրբեջանական զինուժի հետ միայնակ մնացել սահմանազատման աշխատանքներում։ Այս մասին ԱԺ-ում կառավարության անդամների հետ հարցուպատասխանի ժամանակ ասաց պատգամավոր Թագուհի Թովմասյանը։

«Ադրբեջանցիներն են մարդկանց ժամանակ տալիս դատարկել իրենց տներն Արցախում։ Նրանք իրենց ամենազոր GPS-ով որոշում են հայ-ադրբեջանական սահմանում, որտեղ տեղակայվել, ինչու՞։ Քանի դեռ հայ-ադրբեջանական պետական սահմանի խնդիրը վերջնականապես լուծված չէ, նոյեմբերի 26-ին ցավալի միջադեպ ունեցանք Գեղարքունիքի մարզի Սոթք համայնքում։ Ազերիները ներխուժեցին հանքի տարածք ու այդ օրվանից Սոթքի հանքավայրի հետագա ճակատագրի վերաբերյալ մարզի բավականին մեծ թվով բնակիչներ խորը մտավախություն ունեն»,-ասաց պատգամավորը՝ հետաքրքրվելով, թե որ փուլում է պետական սահմանի լուծման խնդիրը, ինչ խոչընդոտներ ունեն և երբ կկարողանան պետական սահմանի խնդրի վերջնական լուծման հանգել։

ՀՀ փոխվարչապետ Տիգրան Ավինյանը նշեց, որ բանակցություններն ամենայն հավանականությամբ տեղի են ունենալու այս տարվանից սկսած և հնարավորինս սեղմ ժամկետներում պետք է իրականացվեն․ «Սոթքի հանքի հետ կապված որոշակի ճշգրտում է տեղի ունեցել և հանքավայրի տարածքի մի հատվածից համապատասխանաբար երկու կողմերի զինված ուժերն ավելի ճշգրիտ են դիրքավորվել և վարչական շենքը գտնվում է հայկական կողմում։ Հանքի շահագործման հետ կապված հարցերն ունեն իրավական հիմնավորումներ և իրավական փաստաթղթեր, դրանք նույնպես այս նույն ֆորմատի բանակցային գործընթացի հարցեր են»,-ասաց փոխվարչապետը։

Ինչ վերաբերում է գյուղացիներին սահմանազատման պրոցեսների ժամանակ մենակ թողնելուն, Տիգրան Ավինյանը նշեց, որ զինված ուժերը և ռուս գործընկերները բոլոր հատվածներում մասնակցում են այդ գործընթացներին․ «Կան հազար ու մի հարցեր, որոնք առաջանում են, քանի որ իրավական սահման, որպես այդպիսին, ֆիքսված չէ, երկու կողմում էլ տեղի են ունենում հարցեր, որոնց ժամանակավոր լուծումներ են տրվում։ Այդ ժամանակավոր լուծումները պետք է հաստատվեն իրավական փաստաթղթերով, որոնք պետք է բանակցությունների արդյունք լինեն»,-ասաց Տիգրան Ավինյանը։

Պատգամավորը նկատեց՝ Սոթքի ոսկու հանքավայրում այսօր աշխատող 984 աշխատակիցներից մյուս տարի առնվազն 600-700-ը կրճատվելու են և հետաքրքրվեց արդյոք կառավարությունը նման տվյալներ ունի, փոխվարչապետը նշեց, որ իրենց ընդհանուր դիրքորոշումն այս շաբաթվա ընթացքում կամբողջականացվի։

Աղբյուր` Փաստինֆո