Փաստ ինֆո

Վարչապետի հրաժարականի պահանջով երթ անցկացնելուց հետո քաղաքացիները հասան Հանրապետության հրապարակ՝ Կառավարության շենքի մոտ ՝ «Նիկոլ, դավաճան», «Առանց Նիկոլ Հայաստան» կոչերով։

Միևնույն ժամանակ Կառավարության շենքի մոտ էին Նիկոլ Փաշինյանի աջակիցները՝ մի քանի տասնյակ մարդ Երեք կին՝ ավտոկայանատեղիում գոչում էին «Նիկոլ Վարչապետ», «Ցավդ տանեմ», սակայն ընդդիմադիր ցուցարարներն ավելի բարձր սկսեցին բղավել՝ «Առանց Նիկոլ Հայաստան»։

Կառավարության շենքի մոտ էր զինվորական հագուստով տղամարդ, որը պնդում էր, թե կռվել է Ջաբրայիլում՝ հոկտեմբերի 8-ից 24-ը։

«Լյուբոյ կռված տղա աջակցում է մեր վարչապետին, մնացածը, ովքեր խոսում են, սուտի հավայի գոռում են։ Վերջին պատրոնը կրակել եմ, եկել եմ հետ։ Ես կռվել եմ, մինչև վերջին պադրոնը խփել եմ, չեն բերել, պադրոնը պրծել ա, թողել եկել եմ տուն, մնայի մեռնեի՞, հոկտեմբերի 8-ին գնացել եմ, հոկտեմբերի 24-ին հետ եմ եկել»։ Վարչապետի աջակիցն ասաց, որ սոված-ծարավ, «անտերուդուս» մնացել են Արցախում։

«Մեր մոտ հանձնված տարածք չի եղել, մենք սաղ կրվել ենք», - ասաց նա։ Լրագրողի դիտարկմանը, թե հանձնված տարածք ասելով՝ նկատի ունի Քարվաճառը, Փաշինյանի աջակիցն արձագանքեց. «Քարվաճառը Ջաբրայիլն ա»։

Վարչապետին աջակցում էր նաև մի երիտասարդ, որը պնդում էր, թե վիրավոր է ու միայն վարչապետն է ստորագրությամբ փրկել իր ու բազմաթիվ զինվորների կյանքը։

Միևնույն ժամանակ վարչապետի հրաժարականի պահանջով բողոքի ակցիայի մասնակիցները հայտարարեցին՝ դադարեցնում են անհնազանդության ակցիաները։ Նշենք, որ ակցիաները դադարեցնելու կոչով հանդես էր եկել ՀՅԴ ներկայացուցիչ Իշխան Սաղաթելյանը։

«Անկախ նրանից մի երկու հոգի սադրիչ կուղարկեն, բայց մենք հազարավոր ենք ու վստահ ենք մեր արժանապատվության ու թասիբի վրա, որ այս շարժումը հաջողելու է»,- ասաց ակցիայի մասնակիցներից մեկը։ ՀՅԴ երիտթևի ներկայացուցիչ Քրիստինե Վարդանյանը նշեց, որ ամեն օր անցկացնելու են նմանատիպ ակցիաներ՝ վարչապետի հրաժարականի պահանջով։

Աղբյուր` Փաստինֆո