Փաստ ինֆո

«Ակցիաները երկու ֆունկցիա ունեն. առաջին՝ իրազեկման, քանի որ մեր հանրության մի հատված դեռ չգիտի՝ իրականում ի՞նչ է տեղի ունեցել Արցախում, և ի՞նչ ենք կորցրել՝ տարածքային և մարդկային կորուստների առումով, երկրորդը կապված է նոր սպառնալիքների հետ, որոնք ստեղծվել են ՀՀ սահմաններում՝ Սյունիքի, Վայոց ձորի, Գեղարքունիքի մարզերում»,- «Հենակետ» վերլուծական կենտրոնի ղեկավար, ռազմաքաղաքական փորձագետ Տիգրան Աբրահամյանը՝ ԱԱԾ շենքի մոտ կազմակերպված ակցիայի ժամանակ, հավելելով, որ իշխանությունը լեգիտիմություն չունի և պետք է հրաժարական ներկայացնեն։

«Այս իրավիճակում չկա այլ տարբերակ, քան այս իշխանության հեռացումն է, և որոշակի փուլում արտահերթ ընտրությունների անցկացումը, ինչը հնարավորություն կտա մեր հանրությանն ընտրելու նոր ուժերի, խմբերի և լիդերների»,- նշեց Աբրահամյանը՝
Ըստ «Հենակետ» վերլուծական կենտրոնի ղեկավարի՝ եռակողմ հայտարարությունն իր մեջ մեծ թվով անորոշություններ է պարունակում, չկան իրագործման մեխանիզմներ, և հենց այդ դետալների շուրջ է, որ նոր ուժերը պետք է բանակցեն և հասնեն առավելագույն արդյունքի:

«Հայտարարության հիմնական կետերը, որոնք վերաբերում են Շահումյանի, Աղդամի շրջաննների և Քաշաթաղի հանձնմանը, արդեն կատարվել են, հանձնվել են, բայց կան մեծ թվով դրույթներ, որոնք չեն իրականացվել, մասնավորապես, ռազմագերիների, զոհվածների մարմինների վերադարձի հետ կապված: Նաև չկան կարգավորումներ, թե այդ հայտարարությունն ինչպես է կարգավորելու ներքին իրավահարաբերություններն Արցախում, նաև՝ Արցախ-Ադրբեջան, Հայաստան-Ադրբեջան հարաբերություններում: Մեզ պետք են բանակցողներ։

Մենք ունենք մեծ թվով խնդիրներ, վերաբաշխումներ, վերադիրքավորումներ մեր սահմանային հատվածում՝ Սյունիք, Վայոց ձոր, Գեղարքունիք, որոնք հրատապ լուծումներ են պահանջում»,- շեշտեց ռազմաքաղաքական փորձագետը, հավելելով, որ ամենակարևոր հարցերն են անվտանգությունը և կարգավիճակը։

ՀՀ-ում անվտանգության հարցերով բանակցում են համայնքի ղեկավարները, այնինչ դրանք ջոկատի կամ համայնքի մակարդակով չպետք է իրականացվեն, այլ լուծվեն պետական մակարդակով։ Իսկ բանակաշինության գործում մեծ անելիքներ կան, իսկ Պաշտպանության նախարարը այդ մասին չի խոսում։

Աղբյուր` Փաստինֆո