Փաստ ինֆո

Ակնհայտ է, որ Նիկոլ Փաշինյանը գնալու է, անհնար է, որ Նիկոլը մնա իշխանության։ Այս մասին Կենտրոն հեռուստաընկերության «Իմպուլս» հաղորդաշարի ընթացքում ասել է «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը:

«Եթե ինքը կայացներ հեռանալու որոշումը 10 օր առաջ՝ Վարդենիսում չէինք ունենա սահմանամերձ գոտի։ Հայաստանի անվտանգությունը չէր լինի վտանգված»,- ասել է նա՝ համոզմունք հայտնելով, որ Դադիվանքը չէր լինի ադրբեջանցիների հսկողության տակ, գերեվարված զինվորները վերադարձված կլինեին Հայաստան։

«Եւս 10 օր եթե հրաժարական չտվեց՝ տնտեսությունն է խնդիր ունենալու։ Նախորդ օրը հանրահավաքի ժամանակ ասել եմ՝ Նիկոլ Փաշինյանի յուրաքանչյուր օր ավել մնալու դեպքում մեր տնտեսությունը չի ստանալու եկամուտ, ինչի հետեւանքով մեր բնակչությունն աղքատանում է։ Նրա յուրաքանչյուր օր ավել իշխանության մնալը նշանակում է, որ նա գողանում է ու աղքատացնում մեր քաղաքացիներին։ Նա պետք է կայացանի որոշում։ Չգիտեմ, եթե 10 օր առաջ որոշում կայացներ՝ մեր երկիրը կունենար այլ ընթացք, վաղը՝ այլ, մեկ շաբաթ հետո՝ այլ»,- ասել է Ա.Վանեցյանը ու ավելացրել. «հարցնում եք ի՞նչ է լինելու իր հետ՝ չգիտեմ, ինչ է լինելու։ Մենք ամեն ինչ անելու ենք, որ Նիկոլ Փաշինյանն անկախ ամեն ինչից ունենա ֆիզիկական անվտանգության երաշխիքներ։

«Այս ընթացքով, որ նա գնում է ՝ փորձելով կառչած մնալ իր աթոռից՝ մի օր կանգնելու է մեծ խնդրի առաջ։ Փաստենք, որ նա չի կարողանում կայացնել հստակ որոշումներ, ինչի արդյունքում ունենք այս ծանր վիճակը մեր երկրում»,- ընդգծել է նա։

Ա.Վանեցյանը նաեւ արձանագրել է, որ Փաշինյանի՝ որոշումներ կայացնելու ունակություն չունենալու պատճառով է, որ պատերազմի ընթացքում ունեցել ենք մեծ զոհեր ու տարածքային կորուստներ։

«Պատերազմից 3-4 օր հետո ԳՇ պետ Օնիկ Գասպարյանը զեկուցել է Փաշինյանին, որ մենք պատրաստ չենք դիմակայել թուրք-ադրբեջանական և միջազգային ահաբեկչական խմբավորումներին, մենք այս պատերազմը պարտվելու ենք և պետք է շուտ կանգնեցնել, սակայն Նիկոլ Փաշինյանը չկայացրեց այդ որոշումը»,- նշել է Վանեցյանը:

Նրա խոսքերով, եթե Նիկոլ Փաշինյանը պատերազմի երրորդ օրը կանգնեցներ պատերազմը, մենք կունենայինք որոշակի կորցրած տարածքներ և գրեթե զոհեր չէինք ունենա: Արթուր Վանեցյանը հարցազրույցի ժամանակ հիշեցրեց նաև, որ ՌԴ նախագահը դեռևս հոկտեմբերի 19-ին Նիկոլ Փաշինյանին լուծում է առաջարկել, սակայն Փաշինյանը կրկին հրաժարվել է, ինչի արդյունքում մենք այս պատկերը ՝ բազմաթիվ զոհեր, կորցրած տարածքներ, քայքայված տնտեսություն։

«Մի քանի անգամ եղավ հրադադարի պայմանավորվածություններ, սակայն չկայացվեց որոշում և ունեցանք այն խայտառակ իրավիճակը, որը ստեղծվել է մեր երկրում: Նիկոլ Փաշինյանը որոշումներ կայացնել չի կարողանում, նա պետական գործչի ունակություններ չունի»,-հարցազրույցի ժամանակ ասել է Արթուր Վանեցյանը:

Աղբյուր` Փաստինֆո