Փաստ ինֆո

Ձայնագրությունը հրապարակելու ժամանակը պատահական չէր ընտրված, քանի որ այն հանդիսանում է PR տեխնոլոգիայի էլեմենտ, և դա հենց այնպես չի օգտագործվել, յուրաքանչյուր PR տեխնոլոգիա ունի ի հայտ գալու կոնկրետ ժամկետ, որպեսզի նրա ազդեցությունը լինի մաքսիմալ: Այս մասին «Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով Սերժ Սարգսյանի և Բելառուսի նախագահի մասնակցությամբ ձայնագրությանը, որտեղ Լուկաշենկոն նշում է, որ Ալիևը ՀՀ երրորդ նախագահ Սերժ Սարգսյանին 5 միլիարդ դոլար է առաջարկել Արցախի 7 շրջաններից հրաժարվելու դիմաց, ինչին ի պատասխան Սերժ Սարգսյանն ասել է, որ ինքը պատրաստ է 6 միլիարդ դոլար տալ Ալիևին, որպեսզի վերջինս հրաժարվի 7 շրջանից:

Փորձագետը նկատում է՝ եթե ձայնագրությունը հրապարակվեր օրինակ 1 տարի առաջ, այն կարող էր նույն ազդեցությունը չունենալ, ինչ հիմա ունեցավ.

«Ձայնագրությունում հնչում է տեսակետ, որ Ադրբեջանը 5 մլրդ է առաջարկել Հայաստանի իշխանություններին՝ Արցախի տարածքները հետ տալու համար, իսկ հիմա, երբ տեսնում ենք կասկածելի պատերազմ տեղի ունեցավ, որում հայկական կողմը միտումնավոր պարտվեց և այդ բովանդակությամբ ձայնագրություն է ի հայտ եկել, արդեն սկսում ես մտածել արդյո՞ք միայն 3-րդ նախագահին է գումար առաջարկվել։ Ներկա վարչապետին նման առաջարկություն եղե՞լ է՝հաշվի առնելով նաև այն, որ ՀՅԴ նախկին անդամներից Աղվան Վարդանյանը ակնարկեց արաբական երկրում տեղի ունեցած ինչ-որ հանդիպումների մասին:Այս ամենից հետո, երբ բոլոր դետալները դնում ենք իրար կողք,ստացվում է, որ որոշակի գործընթացներ են տեղի ունեցել և այդ ձայնագրությունը գալիս է լրացնելու արդեն եղած պատկերները, այդ պատկերի դետալներից մեկն է հանդիսանում այդ ձայնագրությունը, և այդ պատկերը ամբողջովին դրվում է հասարակության գիտակցության մեջ»,-մեզ հետ զրույցում ասաց փորձագետը:

Քաղտեխնոլոգի դիտարկմամբ՝ որքա՞նով է ձայնագրությունը հավաստի, պետք է պարզեն իրավապահ մարմինները, սակայն անժխտելի է, որ նման բան կարող էր տեղի ունենալ, քանի որ ձայնագրության մեջ լսվում են և՛ Սերժ Սարգսյանի, և՛ Լուկաշենկոյի ձայները։

«Միգուցե այլ ձայնագրություննե՞ր եւս արվել են, որոնք կարող են շրջանառության մեջ դրվել:Կարող են շատ այլ ձայնագրություններ լինել 2018թ-ի ապրիլ-մայիսյան իրադարձությունների վերաբերյալ»,-նկատեց Արմեն Բադալյանը:

Քաղտեխնոլոգը ենթադրում է՝ նրանք, ովքեր այս գործընթացը սկսել են, հավանաբար էլի ձայնագրություններ ունեն.

«Այնպես չէ, որ մի լրատվամիջոց ցանկացավ և հրապարակեց ձայնագրությունը, սա կազմակերպված PR գործընթաց է և այս գործընթացը միգուցե չի ավարտվելու, կան այլ ձայնագրություններ, և երբ վարչապետը փորձի հերքել սա, ապա երկրորդ ձայնագրությունը կհայտնվի, որը վարչապետին ամբողջովին սուտ կհանի»,-ասաց Արմեն Բադալյանը:

Մեր այն հարցին՝ինչու՞ իրավապահ մարմինները չեն զբաղվում ձայնագրությամբ և մինչ այս եղած ցուցմունքներին՝քաղտեխնոլոգը պատասխանեց.

«Իրավապահ մարմինները գտնվում են վարչապետի տոտալ վերահսկողության ներքո և վարչապետը թույլ չի տալիս, որպեսզի գործը հետաքննվի»:

Աղբյուր` Փաստինֆո