Փաստ ինֆո

Այս ամենը, ինչ տեղի է ունենում, անվանում եմ էլիտաների հեղաշրջման փորձ։ Այս մասին լրագրողների հետ զրույցի ժամանակ ասաց ԱԺ փոխխոսնակ Ալեն Սիմոնյանը՝ անդրադառնալով վարչապետի հրաժարականի պահանջով անհնազանդության ակցիաներին։

Ալեն Սիմոնյանը նկատեց՝ տեղի ունեցող պրոցեսները միտումնավոր շրջանցում են ՀՀ-ի ժողովրդին, որն իշխանություն ձևավորողն է․ «Մի խումբ քաղաքական գործիչներ որոշել են, որ իրենք պետք է ՀՀ վարչապետ որոշեն և այդ մարդուն նշանակեն ՀՀ ղեկավար մեկ տարով, և չեն խոսում օրինակ ընտրությունների մասին։ Այսինքն վերցնում են ՀՀ քաղաքացիներից ընտրելու իրավունքը։ Դա զարմանալի չէ՝ հաշվի առնելով, թե ում կողմից է կազմակերպված այս էլիտաների հեղաշրջման փորձը, որովհետև բնական է՝ հեղափոխությունից հետո շատ ու շատ տարբեր էլիտաներ կորցրել են իրենց հնարավորությունները, իրենց գումար աշխատելու, ինչ-որ կոչումներ ստանալու հնարավորությունը և այսօր տեսնելով, որ իրավիճակը բարդ է, տարբեր քաղաքական ուժերի կողմից այդ էլիտաները բրդվում են առաջ, որ ՀՀ-ում իշխանափոխություն լինի։ Զավեշտը կրկին կայանում է նրանում, որ չեն ուզում ընտրություններ»,-ասաց Ալեն Սիմոնյանը։

Դիտարկմանը, որ այդ ուժերն ուզում են ընտրություններ անցկացնել մեկ տարի հետո, Ալեն Սիմոնյանը հարցրեց, թե ինչու մեկ տարի հետո․ «Եկեք հիմա անենք։ Ես չեմ բացառում, որ կարող է արտահերթ ընտրություն լինել։ Այսօր ՀՀ իշխանությանը կարելի է ամենատարբեր բաների մեջ մեղադրել, բայց այս իշխանությունը եզակի իշխանությունը, որն այնպիսի երկու ընտրություն է իրականացրել, որը ոչ մեկի մոտ ընտրության կասկած չի առաջացրել։ Ո՞վ որոշեց, որ պետք է օրինակ Վազգեն Մանուկյանը լինի։ Եթե խոսում են ժողովրդի անունից, ասում, որ ժողովուրդը կգնա, կջնջի, թող ժողովրդի վրա հղում անեն։ Ասեն՝ հարգելի ժողովուրդ, եկեք ընտրություններ կազմակերպենք, պահանջենք։ ՀՀ ժողովուրդը պետք է որոշի, միայն ժողովուրդը, ոչ թե էլիտաները։ Չեմ բացառում նման հանգուցալուծումը, որ ինչ-որ ժամանակ, երբ հասկանանք, որ բոլոր պրոցեսներն ավարտված են, որ ռազմագերիների խնդիրն ինչ-որ ձևով լուծված է, ես չեմ բացառում, որ կլինի արտահերթ ընտրություն։ Հիմա էլ եթե ընտրություն լինի, իշխող խմբակցությունը նորից կհաղթի, ես համոզված եմ»,-ասաց Ալեն Սիմոնյանը։

Հարցին՝ արդյոք կարծում է Արցախի կապիտուլյացիան ստորագրած իշխանությունը կրկին կհաղթի ընտրություններում, Ալեն Սիմոնյանը նշեց՝ Արցախի կապիտուլյացիան պատրաստել են, թղթերով գրել, ստորագրել են այն մարդիկ, որոնք հիմա իրենց դրա մեջ են մեղադրում։

Աղբյուր` Փաստինֆո