Փաստ ինֆո

Ռոբերտ Քոչարյանը արձանագրեց այն, ինչ մեկ ամիս է արդեն խոսվում է, այն է՝ Փաշինյանը կամա, թե ակամա ինքն է հրահրել պատերազմը, այն պարագայում, երբ ԳՇ պետը դեռևս հունիս ամսին զգուշացնում էր, որ լայնածավալ պատերազմի դեպքում, որևէ ռեսուրս չունենք հաջողություն հասնելու։ Նա փաստեց, որ երբ երկրի ղեկավարը գիտի, թե ինչ պետք է անի, որ գործը պատերազմի չհասցնի, բայց արեց լրիվ հակառակը»,-«Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը:

Ըստ քաղտեխնոլոգի՝ երկրորդ նախագահի հաջորդ կարևոր հայտարարությունն այն էր, որ Փաշինյանը բանակցային գործընթացում բավականին կոմֆորտային ժառանգություն է ստացել, և եթե չլինեին Փաշինյանի զրոյական կետից սկսելու փորձերը, որոնք չունեին որևէ հետևողականություն, կարելի էր բանակցային գործընթացը շարունակել և խուսափել պատերազմից:

Անդրադառնալով Նիկոլ Փաշինյանի դեկտեմբերի 5-ի ուղերձին՝ քաղաքագետը նկատեց,որ վարչապետի ուղերձների հիմնական իմաստը նույնն է՝ ստացել եմ բանակցային ծանր ժառանգություն, բանակը պատրաստված չէր.

«Նրա ուղերձների հիմնական նպատակը նույնն է, ամեն ինչ բարդել նախկինների վրա, սա Նիկոլ Փաշինյանի հիմնական ռեպերտուարն է, որը վերաբերում է գրեթե բոլոր հարցերին՝ տնտեսություն, ներքաղաքական իրավիճակ, թե ցանկացած այլ ոլորտ, միևնույնն է, հիմնականում մեղավորը նախկիններն են»,-ասաց Վիգեն Հակոբյանը:
Քաղտեխնոլոգի դիտարկմամբ՝ անկախ նրանից, թե անցած 30 տարիներին բանակցային ինչ հաջողություններ և անհաջողություններ են եղել, փաստն այն է, որ կապիտուլյացիան ստորագրվել է Փաշինյանի իշխանության օրոք։

«Ոչ ոք չի ասում, որ նախկին երեք նախագահների օրոք միայն բանակցային հաջողություններ են եղել, բայց առնվազն ստատուս-քվոն պահպանվել է, բանակցային գործընթացը ընթանում էր, եթե կար էլ 5+2 սխեմա, այնուամենայնիվ, այդ փաստաթուղթը թույլ էր տալիս ստատուսի շուրջ բանակցել, իսկ հմուտ դիվանագիտության պարագայում կարելի էր խուսափել պատերազմից»,-ասաց Վիգեն Հակոբյանը:
Վերջինս վստահեցնում է, որ Նիկոլ Փաշինյանի կապիտուլյացիան արդարացնելու փորձերը որևէ կերպ չեն հաջողելու, քանի որ դա իրողություն է, իսկ նրա իշխանության մնալու ամեն րոպեն արժենում է հայրենիքի սահմանային կորուստներ։

«Նիկոլ Փաշինյանը անմխիթար վիճակում է, պարտված վիճակում ինչպես կարող է շարունակել բանակցությունները մի մարդու հետ, որն ամեն օր իրեն ծաղրում է, հարցազրույցի ժամանակ Ռոբերտ Քոչարյանը փորձեց հակադարձի Ալիևին՝ փորձելով ցույց տալ իր տեղը»:

Անդրադառնալով նաև ուղերձում վարչապետի արտահայտած այն մտքին, թե նոյեմբերի 9-ի հարձակման նպատակը կառավարության ղեկավարությանը ֆիզիկապես ոչնչացնելն էր, որ ճշմարտություններ չբացահայտվեն պատերազմի մասին, քաղտեխնոլոգը ասաց.

«Եթե նույնիսկ ենթադրենք, որ այդ ակցիայի նպատակը կառավարության անդամների ֆիզիկական ոչնչացումն էր, անցել է մեկ ամիս, այդ ինչ լուրջ բացահայտումներ են արել կառավարության անդամները , որ նրանց պետք է ոչնչացնեին:Սա Փաշինյանի ֆեյսբուքյան հայտարարությունն էր, զուտ քաղաքական թեմաներ հորինելու և շեղելու համար»:

Վիգեն Հակոբյանի դիտարկմամբ՝ բոլոր բացահայտումները, որոնք այս ընթացքում անում են սպայակազմի ներկայացուցիչները և պատերազմի մասնակիցները, ձեռք չեն տալիս այսօրվա իշխանություններին, շատ նոր կասկածներ են առաջացնում, ինչի պատճառով էլ իշխանությունը արհեստական օրակարգեր հնարում:

Քաղտեխնոլոգը վստահեցնում է՝պետք է ստեղծվի քննիչ հանձնաժողով և քննվեն այս պատերազմի հանգամանքները՝ թարմ հետքերով.

«Նիկոլ Փաշինյանը շատ լավ գիտակցում է, որ կա հասարակական պահանջ և իրավիճակը պահել անհնար է:

Իմ քայլը հասկանում է, որ արտահերթ ընտրություններ անխուսափելի են, ուղղակի ցանկանում են ժամանակ շահել:Նիկոլ Փաշինյանը փորձում է այնպես անել, որ արտահերթ ընտրություններն ինքը կազմակերպի, քանի որ հույս ունի, որ այդ պարագայում կկարողանա իր ձեռքում կենտրոնացնել վարչական ռեսուրսը և ընտրական հանձնաժողովների վերահսկողություն»,-զրույցի վերջում ասաց Վիգեն Հակոբյանը:

Աղբյուր` Փաստինֆո