Փաստ ինֆո

Քիչ առաջ խոսեցի Խնձորեսկի գյուղապետի հետ, թուրքը գտնվում է Խնձորեսկից ընդամենը 600 մետր հեռավորության վրա, այդպես է նաև Սյունիքի բազմաթիվ այլ գյուղերում: Մեր հայրենիքի սահմանը ճշտվում է GPS-ով: Այս մասին ԱԺ-ում իր ելույթի ժամանակ ասաց ԲՀԿ պատգամավոր Նաիրա Զոհրաբյանը:

Զոհրաբյանը նաև ընգծեց, որ պատերազմից հնարավոր կլիներ խուսափել, եթե մենք չունենայինք ատելության հողի վրա եկած իշխանություն.
«Մեզ ասում էին՝ նոր պատերազմ, նոր տարածքներ, ասում էին՝ դժոխք ենք սարքելու: Բայց ունեինք մեկ շաբաթի պատերազմի ռեսուրս, բայց մեր հերոս տղաները պայքարեցին 44 օր: Մեր իշխանություններն այսօր չեն կարողանում զբաղվել նույնիսկ ռազմագերիներով»,-ասաց Զոհրաբյանը՝ հավելելով, որ մարդը, որը Ադրբեջանում հերոս է, չի կարող բանակցել ռազմագերիների շուրջ.

«Այսօր մենք տեսնում ենք, որ ռազմագերիների վերադարձի և Արցախի մնացյալ հատվածի վերականգնման հարցով զբաղվում է ՌԴ-ն: Հայաստանի որևէ կառույց ներգրավված չէ այդ գործընթացի մեջ»,-ասաց Զոհրաբյանը:

ԲՀԿ պատգամավորը վստահեցնում է, որ ստեղծված իրավիճակում միակ ելքը՝ վարչապետի ինքնակամ հեռանալն է.

«Ես չեմ հավատում, որ Փաշինյանը հրաժարական կտա, նա մինչև չհրահրի քաղաքացիական բախումներ, չի հեռանա: Պետք է անենք ամեն ինչ, որպեսզի քաղաքաղաքացիական բախումներ չլինեն»,-ասաց Նաիրա Զոհրաբյանը:

Աղբյուր` Փաստինֆո