Փաստ ինֆո

ԶԼՄ հարգելի ներկայացուցիչներ, «Մեր 2,5 տարեկան զույգ աղջիկները՝ Եվան և Արփին հոգեբանական և ֆիզիկական բռնության են ենթարկվել Կամարակի փողոց, 2րդ նրբանցք հասցեով գործող «Մեր բակ» մանկապարտեզում», - նման հայտարարությամբ են հանդես եկել երեխաների ծնողները:

Տարածված հայտարարության մեջ ասվում է.

«Նրանք մանկապարտեզ են սկսել հաճախել նոյեմբերի 30-ից: Երկու օր անց տաօրինակ վարք ենք նկատել երեխաների մոտ՝ ագրեսիա, վախ, քնի խախտում, դեպրեսիվ տրամադրություն և այլն: Կասկածելով մանկապարտեզում երեխաների հանդեպ հնարավոր վատ վերաբերմունքի մասին՝ ձայնագրող սարք ենք տեղադրել երեխայի տիկնիկի մեջ և ձայնագրել դեկտեմբերի 3-ին երեխաների օրը մանկապարտեզում:

Պարզվել է, որ երեխաներին ծեծում են, անպատվում, վախացնում են, այդ թվում՝ սպառնալով մութ սենյակ տանել, դանակով վիզը կտրել և այլն: Երեխաներին անպատվում են և ծաղրում: Այս ամենը ձայնագրված է և կան անհերքելի փաստեր:

Երբ փորձ ենք արել տնօրենի հետ պարզաբանել ստեղծված իրավիճակը, տնօրենը կաշառք է առաջարկել մեզ՝ հարցին հնչեղություն չտալու խնդրանքով: Այս հեռախոսազրույցի ձայնագրությունը ևս առկա է:

Այժմ մենք մի շարք այլ ծնողների հետ միասին, որոնց երեխաները ևս ենթարկվել են բռնության, դիմել ենք ոստիկանություն:

Խնդրում ենք Ձեր աջակցությունը՝ հարցին հնչեղություն տալու, ծնողների զգոնությունը բարձրացնելու, այդ թվում՝ այլ մանկապարտեզներում բարքերի փոփոխության և տեսանկարահանող սարքերի տեղադրման, նման մասնավոր մանկապարտեզների և զարգացման կենտրոնների գործունեության հետ կապված օրենսդրական բացերը լրացնելու պահանջ ձևավորելու համար»:

Աղբյուր` Փաստինֆո