Փաստ ինֆո

Եթե ցույց անենք, միայն մենք ենք խոսելու կամ նրանք, ովքեր մեզ հետ համաձայն են։ Մենք կազմակերպել ենք լսումներ, որտեղ խոսում են բոլորը։ Այս մասին լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

«Խորհրդարանական ուժն ինչ լծակ ունի պետք է օգտագործի։ Այս լսումները նախաձեռնել ենք այն ժամանակ, երբ ռազմական դրության պայմաններում ամեն ինչ արգելված է եղել։ Հաշվեք սա մեր ցույցն է։ Ի՞նչ տարբերություն։ Հարթակ է, ավելին այն բացել ենք բոլորի համար։ Եթե ցույց անենք, միայն մենք ենք խոսելու կամ նրանք, ովքեր մեզ հետ համաձայն են։ Մենք կազմակերպել ենք լսումներ, որտեղ խոսում են բոլորը, որոնք գրանցվել են և ելույթների 80 տոկոսի հետ կարող է համաձայն չեմ, բայց մենք ստեղծել ենք հարթակ՝ մարդկանց ձայնը լսելու համար։ Պետք չէ բևեռացնել, ասել՝ պետք է անպայման բոլորը ցույց անեն, կամ անպայման բոլորը լսումներ անեն։ Ով ինչ անում է, որը կնպաստի վարչապետի հրաժարականին, թող անի»,-ասաց Էդմոն Մարուքյանը։

Հարցին՝ մինչև դեկտեմբերի 8-ը ժամը 12։00-ը Նիկոլ Փաշինյանը հրաժարական կներկայացնի՞, Էդմոն Մարուքյանն ասաց․ «Վարչապետի հրաժարականի մասին դիմեք նրա մամուլի գրասենյակ, կասեն՝ նախատեսվում է իր հրաժարականի ուղերձը, թե ոչ։ Ես նման տեղեկություն չունեմ։ Թե ինչ կլինի դրանից հետո, վաղը կերևա»,-ասաց պատգամավորը։

Դիտարկմանը, որ ամիսներ առաջ հայտարարել է, որ չի պատկերացնում՝ կլինի իշխանություն, որը կարող է Արցախի հարցի հետ կապված որոշակի գաղտնի բաներ անել կամ դեմ գնալ ժողովրդի ցանկությանը, Էդմոն Մարուքյանն արձագանքեց․ «Ես ասել եմ, որ այն հայտարարությունները, որ արվել են՝ հողերը ծախվելու են, նման մտահոգություն չունեմ։ Հիմա էլ եմ կարծում, որ հողերը չեն ծախվել, և ես ասել եմ, թե ինչի արդյունք է այս ամենը։ Ամեն ինչ կարող ենք դրա տակ դնել, բայց ես փաստ չունեմ ծախելու, պետական դավաճանության մասին փաստ չունեմ»,-ասաց Էդմոն Մարուքյանը։

Աղբյուր` Փաստինֆո