Փաստ ինֆո

Երկար ժամանակ խոսում էի, որ Հայաստանը պետք է ունենա սեփական տեղեկատվական արբանյակ՝ 5-րդ սերնդի պատերազմներին դիմակայելու համար։ Եթե դա ստեղծվեր, մոտավորապես 200 մլն դոլար էր կազմելու։ Այս մասին այսօր խորհրդարանական լսումների ժամանակ ասաց հեռուստամեկնաբան Նաիրի Հոխիկյանը։

«Վերջին անգամ այդ մասին խոսել եմ 2020թ․-ի օգոստոսին Բարձր տեխնոլոգիաների նախարար Հակոբ Արշակյանի հետ, երբ մեղմ ասած ծաղրեց, թե դու նկատի ունես արբանյակային հեռուստաալիքները։ Այնինչ Ադրբեջանը 2012թ․-ից արդեն ստեղծել է երկու AzerSpace 1 և AzerSpace 2 արբանյակները, և հիմնականում նրանց օգնությամբ էին կառավարվում այդ Բայրաքթարները, և մենք կարող էինք սեփական արբանյակով գոնե դիմակայել դրանց»,-ասաց Նաիրի Հոխիկյանը։

Նա նշեց, որ Ադրբեջանը և Թուրքիան Արցախի հարավում տեղակայեցին Սիրիայից մեծ թվով ահաբեկիչների, հիմա էլ պատրաստվում են Քարվաճառում և Քաշաթաղում տեղակայել Սիրիայի թուրքմեն ահաբեկիչներին, որոնք հայտնի են իրենց ռուսատյացությամբ․ «Դա հենց այնպես չի արվում։ Մենք պետք է ներսում, ներքին ատելություն քարոզելու, այլակարծության դեմ պայքարելու փոխարեն հասկանանք, որ 2021 թվականին իմ կարծիքով ունենալու ենք շատ ավելի մեծ ճգնաժամ, նաև պատերազմներ, քան եղավ։ Այս պատերազմում առաջին օրերից Արցախում էի, շատ բան տեսա, այդ թվում բանակի միտումնավոր կամ ոչ միտումնավոր կազմաքանդում և այլն։ Այս անգամ պետք է պատրաստ լինենք դրա հակառակ ճանապարհին։ ԱՄՆ նախագահ դարձավ դեմոկրատ Ջո Բայդենը։ Ամերիկագետները կարող են փաստել, թե դեմոկրատներն ինչ քաղաքական ուղղվածություն ունեն։ Սիրիայից, Իրաքից և Լիբիայից հետո հաջորդ թիրախում Իրանն է հայտնվելու։ Այն, ինչ տեղի կունենա, տեղի կունենա Իսրայելի, ԱՄՆ-ի և ահաբեկիչների համատեղ ուժերի կիրառմամբ, որտեղ իրենց մեծ ներդրումը կունենա նաև Թուրքիան։ Արցախի հարավային շրջանների գրավումն Ադրբեջանի և Թուրքիայի կողմից հենց այնպես չէր։ Ջաբրայիլում տեղակայված բավական մեծ ռազմաբազայում հիմա 5000-ից ավել ահաբեկիչներ են տեղակայված և նրանց կողմից պարբերաբար հարձակումներ են լինում Իրանի շրջանների, սահմանակից տարածքների վրա։ Արդեն բավական շատ զոհեր կան իրանական զինված ուժերից։ Պատահական չէ, որ Իրանը հենց Արցախի սահմանին է տեղակայել իր ռազմական ուժերի հսկայական հատված։ Իրանն աշխարհում ամենամեծ հանքահումքային ռեսուրսներից մեկն ունի և այս պայքարն ինչպես Արցախի, այնպես էլ Իրանի վրա հիմնականում նպատակ ունի գրավել այդ հանքահումքային ռեսուրսները»,-ասաց Նաիրի Հոխիկյանը՝ հավելելով, որ մենք ականատես կլինենք մեծ քանակությամբ ահաբեկիչների ներթափանցմանը Իրանի հյուսիսային շրջաններ։

Նաիրի Հոխիկյանն ընդգծեց, որ մենք պետք է պատրաստ լինենք ավելի մեծ ճգնաժամի, ավելի մեծ պատերազմի․ «2021թվականին մենք կանգնած ենք լինելու ընդհուպ ՀՀ-ի տարածքներ ունենալ-չունենալու առաջ։ Շատ պատգամավորներ հատկապես իշխող խմբակցությունից մի քանի անգամ «խնդրել են» ինձ չխոսել այս խնդիրների մասին։ Ես պետք է խոսեմ, որովհետև չխոսել նշանակում է դավաճանել մեր ազգային անվտանգությանը»,-հավելեց Նաիրի Հոխիկյանը։

Աղբյուր` Փաստինֆո