Փաստ ինֆո

Վարչապետն օր առաջ պետք է փոխվի, որովհետև այդ դեպքում կառավարության նկատմամբ վստահությունը կվերականգնվի։Այս մասին խորհրդարանական լսումների ժամանակ հայտարարեց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

«Պետական ինստիտուտները կվերականգնեն իրենց ամենօրյա բնականոն գործունեությունը, և երբ ադրբեջանցիները գալիս, ասում են՝ ըստ այս GPS-ի պետք է այստեղ կանգնեն, այնտեղ իրենց կդիմավորեն մեր պետական մարմինների ներկայացուցիչները, այլ ոչ թե կդիմավորեն գյուղապետերը կամ մեր զինված կամավորականները»,-ասաց Էդմոն Մարուքյանը։

Անդրադառնալով «Բարգավաճ Հայաստան» խմբակցության պատգամավոր Միքայել Մելքումյանի այն հարցին, արդյոք նախքան պատերազմը զգացե՞լ է, որ Պաշտպանության և ԱԳ նախարարները ներկայացնեն իրական վիճակն ու ռիսկերը, Էդմոն Մարուքյանը նկատեց՝ բազմաթիվ կանխատեսումներ կային, որ 2020թ․-ին պատերազմ է լինելու․ ««Լուսավոր Հայաստան» խմբակցությունը 2020 թվականը սկսել է անվտանգության սեկտորի մոնիտորինգ նախաձեռնությամբ։ Փակ ռեժիմով խմբակցություն են հրավիրվել ՊՆ-ն, ԱԱԾ պետը, ԱԽ քարտուղարը, ՀՀ ոստիկանապետը։

Այսինքն ներքին, արտաքին անվտանգության խնդիրները քննարկվել են և եթե հիշում եք, այդ ժամանակ Իրանում սպանվեց հայտնի գեներալը։ Այդ օրերին տարածաշրջանը շատ լարված էր։ Փակ հանդիպման ժամանակ Պաշտպանության նախարարին հարց տվեցինք՝ արդյոք ՍՈՒ-երը ճիշտ գնում են և նախարարն այդ ՍՈՒ-երի հետ կապված մեզ այնպիսի բաներ է ասել, որ ուղղակի սկսեցինք ամաչել, թե ինչու ենք նման հարց բարձրացրել, եթե այդքան կարևոր, դիպուկ գնում է իրականացվել, որ եթե հանկարծ պատերազմ սկսվի, թշնամուն հողին են հավասարեցնելու։

Պն նախարարի զեկույցը դրա մասին է եղել։ ԱԽ քարտուղարն էլ ասում էր՝ մենք տիրապետում ենք, ամեն ինչ գիտենք։ Լավրովը նոր էր այն վիճահարույց հայտարարություններն արել և ԱԳ նախարարը մեզ հետ հանդիպման ժամանակ հավաստիացրեց, որ ամեն ինչ նորմալ է, մեր վերահսկողության ներքո է»,-ասաց պատգամավորը։

Աղբյուր` Փաստինֆո