Փաստ ինֆո

«Կորոնավիրուսային վարակը հիմա մեր երկրում անարգելք կերպով տարածվում է բնակչության բոլոր շրջաններում: Իմ կանխատեսումներով, մինչև հունվար ամսվա վերջին, Հայաստանի բնակչության 60- 70 տոկոսը վարակված և առողջացած է լինելու կորոնավիրուսային վարակից,- ասում է համաճարակաբան Ռուբեն Հովհաննիսյանը, «Փաստինֆո»-ի հետ զրույցում անդրադառնալով հանրապետության տարածքում կորոնավիրուսային վարակի տարածելիության տեմպերի և դրանց թողած հետևանքների թեմային և հավելում,- վարակի տարածվածությունը մեր երկրում հասել է այն աստիճանի, որ, այս պահին ձեռնարկվող որևէ միջոցառում, այլևս ի զորու չէ կանգնեցնելու դրա տեմպերը: Նույն դիմակ կրելն,անգամ դարձել է ոչ թե վարակը կանխարգելող միջոց, չնայած ես առիթներ ունեցել եմ ասելու, որ միայն դիմակ կրելով, մենք վարակի փոխանցումը չենք կարող կանգնեցնել, գուցե վարակի տեմպերը նվազեցնենք, բայց ոչ երբեք կանգնեցնենք, այլ այս ձևով դիմակ կրելը նույնիսկ նպաստում է կորոնավիրուսի տարածմանը: Ինչպե՞ս է դա տեղի ունենո՞ւմ՝ պարզապես մարդիկ այդպես էլ չընկալեցին դիմակ կրելու անհրաժեշտությունն ու դրա էթիկան: Երբ միևնույն դիմակն ամբողջ օրը դեմքիդ է, ընդ որում, անկախ նրանից՝ որտե՞ղ ես դու գտնվում՝ դրսո՞ւմ, թե՞ փակ տարածության մեջ, ապա պետք չի զարմանալ, որ այն ոչ թե կանխարգելում, այլ նպաստում է վիրուսի տարածմանը»:

Արդյո՞ք Առողջապահության նախարարությունը կարողանում է հետպատերազմյան իրավիճակում հակահամաճարակային բնույթի պատշաճ աշխատանքներ կատարել՝ հանրապետության տարածքում վիրուսի տարածումն ինչ – որ կերպ կանխելու համար, Ռուբեն Հովհաննիսյանը պատասխանում է՝ վարակի տարածման դեմ միջոցառումների համակարգված և կանխարգելիչ աշխատանքների առյուծի բաժինը պետք է նախաձեռնվեր և իրականացվեր դրա՝ երկիր մուտք գործելու հենց առաջին փուլում, ինչն, ակնհայտ կերպով չի արվել.«Կորոնավիրուսային վարակի տարածման հենց առաջին փուլում դրա կանխարգելմանը միտված աշխատանքներում հսկայական բացթողումներ եղան: Հետագայում, արդեն պետական քարոզչամեքենայի գումարումը, դիմակներ կրելու, ձեռքերը լվանալու և սոցիալական հեռավորություն պահպանելու, իմ կարծիքով, անտեղի շահարկված քարոզն, արդեն իսկ անարդյունավետ էր: Հիմա փորձել գնահատել՝ ի՞նչ պետք է անել հետպատերազմյան ընթացքում վարակի տեմպերը կանխելու համար, իմ կարծիքով, արդեն շատ ուշացած թեմա է: Կրկին, իմ սուբյեկտիվ կարծիքով, հիմա որևէ էական միջոցառում, այդ ուղղությամբ չի իրականացվում: Արդեն տևական ժամանակահատված Առողջապահության նախարարությունը, կարելի է ասել, միայն հիվանդաբուժությամբ է զբաղվում, որտեղ ևս շատ անպատասխան հարցեր կան»:

Անդրադառնալով հարցին՝ ի՞նչ տրամաբանությամբ էր Հայաստանում սկսված պատերազմի թեժ օրերին, Առողջապահության նախարարությունը կորոնավիրուսային վարակի աստղաբաշխական թվեր հրապարակում, իսկ տխրահռչակ նոյեմբերի 9-ից հետո այդ թվերը, հանկարծ, սկսեցին շեշտակի անկում ապրել, արդյո՞ք այստեղ ինչ – ինչ պատճառներով հրապարակված թվերի առնչությամբ մանիպուլյացիայի տարրեր չկային, համաճարակաբանը պատասխանում է՝ նախ, պատերազմի օրերին հետազոտությունների կտրուկ աճ է գրանցվել և, համապատասխանաբար, հետազոտությունների մեծ թվերի պարագայում՝ նաև վարակի մեծ թվեր են արձանագրվել.

«Եթե հիմա էլ նույն քանակի հետազոտություն կատարվի, կրկին հիվանդացության մեծ թվեր կարձանագրվեն: Գիտե՞ք, բացի բուժաշխատող լինելուց, մենք նաև հասարակ քաղաքացիներ ենք, հետևաբար, ուզում եմ իմ սեփական օրինակը բերել՝ իմ շրջապատում, յուրաքանչյուր ընտանիքում, եթե որևէ մեկի մոտ կորոնվիրուսային վարակ էր արձանագրվում, ընտանիքի մնացյալ անդամները չէին էլ գնում հետազոտման, ենթադրելով, որ իրենք, հավանաբար, նույնպես վարակակիր են և տնային պայմաններում ինքնաբուժում էին ստանում, համարելով, որ իրենք բուժվել են, սակայն, շատ դեպքերում դա կարող էր լինել, ասենք, ոչ թե կորոնավիրուսային վարակ, այլ ուղղակի մրսածության արդյունք և հետևանք: Ցավոք սրտի, իրենց իրական որպիսությամբ Առողջապահության նախարարությունում, առանձնապես, ոչ ոք չէր էլ հետաքրքրվում, հետևաբար, չի բացառվում, որ լինելով, ասենք, կորոնավիրուսի վարակակիր, նրանք կարող էին վարակել ավելի լայն շրջանակների: Հետևաբար, իմ կարծիքով, պատերազմի օրերին արձանագրված վարակի մեծ թվերը պայմանավորված են եղել հենց այսպիսի հանգամանքներով, այլ կերպ ասած՝ ոլորտի թույլ տված ամենաթողությամբ»:

Նկատառմանը, թե աշխարհը նախապատրաստվում է կորոնավիրուսային վարակի երրորդ ալիքին, այնինչ, այստեղ՝ Հայաստանում Կառավարության որոշմամբ արդեն այսօրվանից բացվել են ուսումնական հաստատությունների դռներ և, արդյո՞ք, սա առիթ չի՞ հանդիսանա՝ երկրում արդեն իսկ եղած վարակի անվերահսկելի տեմպերի, առնվազն կրկնապատկմանը, համաճարակաբան Ռուբեն Հովհաննիսյանն ընդգծում է՝ գուցե շատերի համար անսպասելի լինի իր պատասխանը, բայց լուրջ հետազոտությունների արդյունքները ցույց են տվել, որ երեխաներից վարակի տարածելիության տեմպերն իրականում այդքան զարհուրելի թվեր չեն արձանագրում, ինչպես որ դա ներկայացվում է: Ըստ վերջինիս, հաշվի առնելով երկրի ներսում կորոնավիրուսային վարակի արդեն իսկ ունեցած տարածելիության անվերահսկելի տեմպերը՝ սրանից ավելի վատթար իրավիճակ դժվար է պատկերացնել:

Աղբյուր` Փաստինֆո