Փաստ ինֆո

ՀՀ և ՌԴ Արտաքին գործերի նախարարները հանդիպման ժամանակ քննարկել են Լեռնային Ղարաբաղում մարդասիրական արձագանքման կենտրոն ստեղծելու գործնական ասպեկտները։

«Մենք խոսեցինք նաև մարդասիրական արձագանքման կենտրոն ստեղծելու հետ կապված հարցերի մասին. դա նախագահ Պուտինի նախաձեռնությունն է: Մենք առաջարկել ենք այս կենտրոնը դարձնել միջազգային՝ Հայաստանի և Ադրբեջանի մասնակցությամբ»,-ասել է Լավրովը՝ հայ գործընկերոջ հետ հանդիպումից հետո լրագրողների հետ տեղի ունեցած  ճեպազրույցում:

«Այժմ քննարկվում են այս նախաձեռնության հետ կապված գործնական հարցեր. դրա իրականացմանը կմասնակցեն Ռուսաստանի շատ նախարարություններ և գերատեսչություններ», - նշել է նա:

ՌԴ-ն բավարարված է, որ հրադադարն արդեն մեկ ամիս է՝ պահպանվում է, վերադառնում են փախստականները, տեղաշարժ կա գերիների և աճյունների փոխանակման, անհետ կորածների որոնման հարցերում։

«Մենք շահագրգռված ենք, որպեսզի այդ սուր հումանիտար հարցերը կարգավորվեն հնարավորինս շուտ, և այդ ուղղությամբ մենք արդեն նախանշել ենք մի քանի քայլ»,- նշեց Սերգեյ Լավրովը:

ՌԴ արտաքին գործերի նախարարը մեկ անգամ էլ ողջունեց ՀՀ նորանշանակ ԱԳ նախարարին, որն իր առաջին արտասահմանյան այցն է կատարել Մոսկվա։ Լավրովը նշեց, որ բանակցություններն անցել են, ինչպես միշտ ջերմ, դաշնակցային և գործընկերային հարաբերություններում։

Լավրովը հիշեցրեց, որ նոյեմբերի 21-ին ՌԴ նախագահի հանձնարարությամբ Երևանում, այնուհետև Բաքվում էր Ռուսաստանի միջգերատեսչական պատվիրակությունը: ՀՀ վարչապետ Նիկոլ Փաշինյանի, ԱԳՆ, ՊՆ և մեր մյուս գործընկերների հետ քննարկել են նոյեմբերի 9-ին երկրների ղեկավարների կողմից համատեղ հայտարարության ստորագրումից հետո ստեղծված իրավիճակը:

«Քննարկեցինք նաև, թե ինչ խնդիրներ են առաջ եկել բոլորիս համար՝ ԼՂ խնդրի ամբողջական կարգավորման, ինչպես նաև ՀՀ և ՌԴ երկկողմ հարաբերությունների համար: Մենք ունենք միասնական դիրքորոշում, որ նոյեմբերի 9-ի հայտարարությունը ԼՂ հակամարտության համար ստեղծում է բոլոր անհրաժեշտ հիմքերն արդարության հիման վրա՝ հայ և ադրբեջանցի ժողովուրդների շահերը հաշվի առնելով»։

Լավրովը շնորհակալություն հայտնեց՝ ռուս խաղաղապահ ուժերի աշխատանքը բարձր գնահատելու համար, կարևորել է նաև քաղաքացիական բնակավայրերի, ենթակառուցվածքների վերականգնման, առողջապահության ոլորտի վերականգնման հարցերը։

«Հետաքրքրված ենք նաև, որ ենթակառուցվածնքերի և տնտեսության վերականգնումը հիմք կհանդիսանա հարևանների միջև ջերմ հարաբերությունների համար։ Սա հնարավորություն է, որ տարածաշրջանում ձևավորվի վստահության մթնոլորտ»,-ասել է  Լավրովը։

Աղբյուր` Փաստինֆո