Փաստ ինֆո

Այսօր ելույթ պետք է ունենար ԲՀԿ ղեկավար Գագիկ Ծառուկյանը, բայց Նիկոլ Փաշինյանի հրահանգով հերթական անգամ նա կանչվել է ԱԱԾ, որպեսզի հնարավորություն չունենա Ձեզ անկեղծորեն պատմելու՝ ինչ օրհասական վիճակում է այսօր գտնվում մեր երկիրը։ Այս մասին Ազատության հրապարակում ասաց ԱԺ «Բարգավաճ Հայաստան» խմբակցության պատգամավոր Իվետա Տոնոյանը։

Պատգամավորը հավաքվածներին ներկայացրեց Գագիկ Ծառուկյանի ուղերձը.

«Սիրելի հայրենակիցներ, Ազատությա հրապարակում այսօր ես պետք է լինեի Ձեր կողքին, պետք է խոսեի Ձեզ հետ մեր երկրին պատուհասած իրավիճակի ու դրանից ելքեր փնտրելու հնարավոր տարբերակների մասին, բայց ինչպես գիտեք հերթական անգամ վախկոտ իշխանությունների ձեռքով ես այս պահին գտնվում եմ ԱԱԾ-ում։ Իշխանությունները հերթական անգամ ապացուցեցին, որ սարսափում են ինձանից, ամեն ինչ անում են, որ չկարողանամ հանդիպել իմ ժողովրդի հետ։ Նախկինում ասել եմ և նորից կրկնում եմ, Նիկոլ Փաշինյանը պետք է վախենա ոչ թե ինձանից, այլ իր վարած խայտառակ քաղաքականության հետևանքներից, իր պահած ժողովրդի բարկությունից, անտուն ու անհայրենիք մնացած շուրջ 100 հազար արցախցիների զայրույթից, զավակ կորցրած ծնողի ցասումից։

Մեր ժողովրդի ու հայրենիքի առաջ ծառացած օրհասական խնդիրները լուծելու փոխարեն Նիկոլ Փաշինյանը շարունակում է իմ հանդեպ իրականացվող քաղաքական հետապնդումները։ Իր աթոռը պահելու համար Նիկոլ Փաշինյանը պատրաստ է անգամ ամենաստոր քայլերին։ Ես դեռևս ամիսներ առաջ կանխատեսում էի, որ մեր երկրի իշխանությունների վարած խայտառակ քաղաքականության պատճառով մոտալուտ վտանգ է հասունանում։ Դեռևս 6 ամիս առաջ եմ հայտարարել, որ օր առաջ այս իշխանությունները պետք է հեռանան։ Դա իմ անձնական ցանկությունն ու ամբիցիան չէր, դա մոտալուտ վտանգը կանխելուն ուղղված իմ քայլն էր։ Այդ ժամանակ իմ առաջին մտահոգությունը հենց Արցախի անվտանգությունն էր։ Դեռևս հունիսի 5-ին էի հայտարարել, որ բացառիկ տաղանդ է պետք ունենալ ռազմավարական գործընկերների հետ հարաբերություններն այս աստիճան վատացնելու համար։ Այն ռազմավարական գործընկերոջ՝ ՌԴ-ի հետ, որը ևս մեկ անգամ ապացուցեց, որ դարերով ամրապնդված բարեկամությամբ դժվարին այս օրերին կրկին օգնության ձեռք մեկնեց ու կանգնեց հայ ժողովրդի կողքին։ Հունիսի 16-ին ԱԺ ամբիոնից հայտարարել էի, որ իշխանությունները պետք է բաց ու թափանցիկ հայտարարեն, թե ինչի շուրջ են բանակցում Փաշինյանն ու Ալիևը։ Իհարկե Նիկոլ Փաշինյանի հրաժարականի հիմքում ընկած էր նաև տնտեսության ողնաշարի կոտրումը, կորոնավիրուսի դեմ պայքարի ձախողումը, արտաքին աշխարհի գործընկերների հետ հարաբերությունների վատթարացումը և բազմաթիվ այլ գործոններ, բայց իմ թիվ մեկ անհանգստությունն ու մտահոգությունն Արցախն ու Արցախի անվտանգությունն էր։ Հիմա արդեն Արցախի խայտառակ կապիտուլյացիայից հետո Նիկոլ Փաշինյանի հրաժարականն այլևս այլընտրանք չունի։ Որևէ երկրում չի եղել նման բան, որ պարտված, թշնամու առաջ ծնկի իջած, թշնամու կողմից ամենավերջին ձևով ստորացված ղեկավարն ու իր քաղաքական թիմը շարունակեն պաշտոնավարել։

Պետք է ձևավորվի նոր իշխանություն, որը հնարավորություն կտա վարել նոր բանակցություններ։ Իհարկե այս փուլում որքան էլ ցավալի է գիտակցել և ընդունել, Արցախը ետ բերել, դժբախտաբար, չենք կարող, բայց գոնե նոր իշխանությունը հնարավորություն կունենա բանակցությունների արդյունքում մինիմումի հասցնել խայտառակ փաստաթղթի արդյունքում նախատեսված հետևանքները, հնարավորություն կունենա արժանապատվորեն շարունակել բանակցային գործընթացը, հնարավորություն կունենա արտաքին աշխարհի հետ մեր ազգային շահերը պաշտպանող բանակցություններ վարելու, բայց ինչ ենք տեսնում այս օրերին։ Փոխանակ Նիկոլ Փաշինյանը, ընդունելով իր և իր թիմի խայտառակ պարտությունը, ներողություն խնդրի ու լուռ հեռանա, նա ամեն օր փորձում է արդարանալ և իր խայտառակ պարտությունն ամեն օր բարդել մեկի վրա»,-նշված էր Գագիկ Ծառուկյանի ուղերձում։

Աղբյուր` Փաստինֆո