Փաստ ինֆո

«Հիմա երևի այնպիսի ժամանակներ են, որ ցանկացած սուտ կարելի է ասել ու անցնել։ Հիմա էլ մարտերում ձախողումների համար ուղիղ պատասխանատվություն են դնում ինձ վրա»,- ֆեյսբուքյան ուղիղ եթերում հայտնել է Նիկոլ Փաշինյանը, անդրադառնալով այն քննարկումներին, թե վարչապետը մարտեր է ղեկավարել։

«Վարչապետը մարտ է ղեկավարո՞ւմ կամ ղեկավարել, վարչապետը վաշտի հրամանատարի մակարդակով որոշումներ է կայացնո՞ւմ կամ թեկուզ գնդի հրամանատարի։ Վարչապետը միանձնյա որոշումներ է կայացրե՞լ։ Վարչապետը մի անգամ է միանձնյա որոշում կայացրել պատերազմի ընթացքում և այդ որոշման շնորհիվ 7-րդ պաշտպանական շրջանն իր տեղում է, որովհետև ոմանք խուճապի մեջ ուզում են 7-րդ պաշտպանական շրջանն էլ հանձնել։ Լավ է գոնե հիմա խոստովանում են, որ այդ պատերազմը հաջող ավարտելու շանս կար»,- ասաց Փաշինյանը։

Նիկոլ Փաշինյանը բարձրացրեց այն հարցը, թե՝ լրիվ անհույս ու խելագար պատերազմում ինչո՞ւ չեղավ հաջողություն և ի՞նչ կապ ունեն այդ անհաջողության հետ առաջնագծից եկած զինվորների վկայությունները, որ պատերազմի առաջին օրերից ինչ-որ մարդիկ առաջնագծում լուրեր են տարածել, թե հողերը ծախած են, թե Նիկոլը հողերը ծախել է, կռիվն անիմաստ է։

«Ի՞նչ կապ ունի պարտության հետ այն փաստը, որ հայաստանյան որոշ քաղաքական շրջանակներ դեռ ամիսներ առաջ՝ սեպտեմբեր-հոկտեմբերին պատերազմ ու ներքաղաքական անակնկալներ էին խոստանում, էդ ո՞ւմ հետ էին պայմանավորվել պատերազմի և ներքաղաքական անակնկալների շուրջ, դրանք էլ հո հրապարակային հայտարարություննե՞ր են»։

Նիկոլ Փաշինյանն ասում է, թե միգուցե գլոբալ առումով ուժ չենք ունենալու խոստովանել, որ ձախողման պատճառն այն էր, որ Հայաստանը առնվազն 25 տարի եղել է կոռումպացված։

«Այսօր քաղաքական ակտիվություն ցուցաբերող էլիտայի առնվազն ամենաազդեցիկ մասը այլ բան չի արել, քան անձնական հարստություն կուտակելը ու պետության դիմակայության ամբողջ ռեսուրսը կերել է, մսխել, քայքայել ու տեղափոխել է շվեյցարական բանկեր ու այդ ամենը՝ մեկ, երկու հոգի չի արել, այլ համակարգ, բազմաթիվ շոշափուկներով և այդ համակարգը ամեն օր դիմադրել է ու հասել է կուլմինացիայի։ Այդ դիմադրության նպատակն է այս պատերազմի ու դրան նախորդած իրադարձությունների մասին ճշմարտությունը չիմացվի, ամեն ինչ մնա մանիպուլյացիաների մակարդակում»։

Նիկոլ Փաշինյանը նոյեմբերի 9-ի գիշերը կառավարությունում քաղաքացիների մուտքն անվանեց հարձակում ու ասաց. «Նպատակը իրականում կառավարության ղեկավարությանը ֆիզիկապես ոչնչացնելն էր, որ շատ ճշմարտություններ չբացահայտվեն այս պատերազմի մասին, բայց դրանք չեն կարող չբացահայտվել»։

Աղբյուր` Փաստինֆո